ᓄᓇᖃᖅᑳᖅᑐᓄᑦ ᐱᔨᑦᑎᕋᑦᑎᒃᑯᑦ ᑲᓇᑕᒥ - ᐳᕙᓪᓗᓐᓇᖅᑐᖃᕈᓐᓃᖅᑎᑦᓯᓂᕐᒥ ᐃᓄᐃᑦ ᓄᓇᖕᒐᓕᒫᒥ

ᐳᕙᓪᓗᓐᓇᖅᑐᖅ ᑭᓲᖕᒪ?

ᐳᕙᓪᓗᓐᓇᖅᑐᖅ (TB) ᐊᐃᑦᑐᕐᓗᖕᓇᖅᑐᖅ ᐋᓐᓂᐊᖑᓪᓗᓂ ᖁᐱᕐᕈᐊᕐᔪᖕᓂᙶᓲᖅ ᓯᐊᒻᒪᑉᐸᓪᓕᐊᓲᖅ ᐊᓂᕐᓂᒃᑯᑦ ᑭᓇᑐᐃᓐᓇᖅ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᖃᖅᑐᖅ ᖁᐃᖅᓱᖅᐸ, ᑕᒋᐅᒃᓴᖅᐸ, ᐃᙱᖅᐸ ᐅᕝᕙᓘᓐᓃᑦ ᐅᖃᓪᓚᒃᐸ. ᐊᒃᑐᐃᓂᖃᕐᓂᖅᓴᐅᓲᖅ ᐳᕙᖕᓂ ᐊᒻᒪᓗ ᐊᓂᖅᑎᕆᔾᔪᑎᓂ ᑭᓯᐊᓂ ᐊᒃᑐᐃᓂᖃᕈᓐᓇᕐᒥᔪᖅ ᑎᒥᐅᑉ ᐃᓚᖓᑕ ᐊᓯᖏᓐᓂ.

ᐳᕙᓪᓗᓐᓇᖅᑐᖅ ᐊᐃᑦᑐᕐᓗᖕᓇᕈᓐᓇᙱᑦᑑᔪᓐᓇᖅᑐᖅ (ᐳᕙᓪᓗᓐᓇᖅᑐᖅ ᖁᐱᕐᕈᐊᕐᔪᐃᑦ ᐆᒪᓂᖃᙱᒃᑯᑎ ᑎᒥᒥ, ᓴᖅᑭᔮᖅᑎᑦᑎᓇᑎ ᓇᓗᓇᐃᖅᓯᔾᔪᑎᓂ ᐊᒻᒪᓗ ᓯᐊᒻᒪᒍᑕᐅᔪᓐᓇᙱᑦᑐᖅ ᐊᓯᖕᓄᑦ) ᐅᕝᕙᓘᓐᓃᑦ ᐊᐃᑦᑐᕐᓗᖕᓇᖅᑐᖅ (ᐳᕙᓪᓗᓐᓇᖅᑐᖅ ᖁᐱᕐᕈᐊᕐᔪᐃᑦ ᐆᒻᒪᒃᐸᑕ, ᓴᖅᑭᔮᖅᑎᑦᑎᓪᓗᑎ ᓇᓗᓇᐃᖅᓯᔾᔪᑎᓂ ᐊᒻᒪ ᓯᐊᒻᒪᒍᑕᐅᔪᓐᓇᖅᖢᑎ ᐊᓯᖕᓄᑦ). ᐊᐃᑦᑐᕐᓗᖕᓇᙱᑦᑐᖅ ᐳᕙᓪᓗᓐᓇᖅᑐᖅ ᓱᖅᑭᐃᖅᑕᐅᔪᓐᓇᖅᑐᖅ ᐳᕙᓪᓗᓐᓇᖅᑐᒧᑦ ᐅᕕᓂᒃᑯᑦ ᖃᐅᔨᓴᐅᑎᒃᑯᑦ, ᐅᕝᕙᓘᓐᓃᑦ ᑖᔅᓱᒧᖓ interferon gamma release assay (ᐊᐅᒃᑯᑦ ᖃᐅᔨᓴᐅᑎᒃᑯᑦ). ᐊᐃᑦᑐᕐᓗᖕᓇᖅᑐᖅ ᐳᕙᓪᓗᓐᓇᖅᑐᖅ ᐊᒃᑐᐃᓂᓕᒃ ᐳᕙᖕᓂ ᐊᒻᒪᓗ ᐊᓂᖅᑎᕆᔾᔪᑎᓂ ᓱᖅᑯᐃᖅᑕᐅᔪᓐᓇᖅᑐᖅ ᐅᕆᐊᖅᑎᑦᑎᓗᑎ ᖃᐅᔨᓴᕐᓂᒃᑯᑦ, ᐊᒻᒪᓗ ᓴᕝᕕᒃᑯᑦ ᑕᕐᕋᖅᑐᐃᓂᒃᑯᑦ.

ᑕᒪᒃᑮ ᐊᐃᑦᑐᕐᓗᖕᓇᙱᑦᑐᖅ ᐳᕙᓪᓗᓐᓇᖅᑐᖅ ᐊᒻᒪᓗ ᐊᐃᑦᑐᕐᓗᖕᓇᖅᑐᖅ ᐳᕙᓪᓗᓐᓇᖅᑐᖅ ᒪᒥᓴᖅᑕᐅᔪᓇᖅᑐᑦ ᐄᔭᒐᕐᓄᑦ ᖁᐱᕐᕈᐊᕐᔪᖕᓂ ᑐᖁᓴᐃᓲᒧᑦ. ᒪᒥᓴᖅᑕᐅᙱᒃᑯᓂ, ᐊᐃᑦᑐᕐᓗᖕᓇᙱᑦᑐᖅ ᐳᕙᓪᓗᓐᓇᖅᑐᖅ ᐱᕙᓪᓕᐊᔪᓐᓇᖅᑐᖅ ᐊᐃᑦᑐᕐᓗᖕᓇᖅᑐᖅᒧᑦ ᐳᕙᓪᓗᓐᓇᖅᑐᒧᑦ. ᐊᐃᑦᑐᕐᓗᖕᓇᖅᑐᖅ ᐳᕙᓪᓗᓐᓇᖅᑐᖅ ᑐᖁᔾᔪᑕᐅᔪᓐᓇᖅᑐᖅ ᒪᒥᓴᕈᑕᐅᙱᒃᑯᓂ.

ᑭᓇ ᐅᓗᕆᐊᓇᖅᑐᒦᒻᒪ?

ᐃᓄᓕᒫᐸᓗᖕᓄᑦ ᑲᓇᑕᒥ, ᐅᓗᕆᐊᓇᕐᓂᖓ ᐱᕙᓪᓕᐊᓂᕐᒧᑦ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᒥ ᐊᑦᑎᒃᑐᒻᒪᕆᐊᓗᖕᒦᑦᑐᖅ. ᑭᓯᐊᓂ, ᖃᔅᓯᖏᓐᓃᓐᓂᖏᑦ ᐊᐃᑦᑐᕐᓗᖕᓇᖅᑐᖅᒧᑦ ᐳᕙᓪᓗᓐᓇᖅᑐᒧᑦ ᖁᑦᑎᓂᖅᓴᐅᔪᑦ ᑲᓇᑕᒥ ᐃᓅᓂᑰᔪᓄᑦ ᓄᓇᖃᖅᑳᖅᓯᒪᔪᓄᑦ, ᐊᒻᒪᓗ ᖁᑦᑎᓂᖅᓴᐅᒋᓪᓗᓂ ᐃᓚᖏᓐᓂ ᐃᓄᐃᑦ ᓄᓇᓕᖏᓐᓂ.

ᐅᓂᒃᑲᐅᓯᕆᔭᐅᓯᒪᔪᖅ ᐃᓄᒋᐊᕐᓂᖏᑦ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᖃᖅᑐᑦ ᐃᓄᖕᓂᑦ ᑕᐃᑲᓂᕐᒥᐅᖑᔪᓂ ᐃᓄᐃᑦ ᓄᓇᖕᒐᓂ ᐅᖓᑖᓅᖓᓚᐅᖅᑐᖅ 300-ᖏᖅᓱᕐᓗᒍ ᑕᐃᒃᑯᓂᖓ ᑲᓇᑕᒥ ᐃᓅᓂᑯᓂ ᓄᓇᖃᖅᑳᖅᓯᒪᙱᑦᑐᓂ 2016-ᒥ. ᐃᓄᒋᐊᕐᓂᐊᓗᖏᑦ ᐅᓄᖅᑐᓂ ᐱᔾᔪᑎᖃᖅᑐᖅ, ᐃᓚᒋᔭᐅᓪᓗᓂ ᐃᒡᓗᑭᒃᓴᓗᐊᕐᓂᖏᑦ, ᓂᕆᔭᒃᓴᖃᑦᑎᐊᙱᓐᓂᖏᓐᓄᑦ, ᐊᔪᖅᓴᕐᓂᖏᓐᓄᑦ, ᐊᑭᕋᖅᑐᖅᑕᐅᓐᓂᖏᓐᓄᑦ, ᐊᒻᒪᓗ ᐊᒃᑐᐃᓂᐅᔪᓂ ᒐᕙᒪᒃᑯᓐᓄ ᑲᒪᒋᔭᐅᓂᖏᓐᓄᑦ ᐳᕙᓪᓗᓐᓇᖅᑐᒥ ᐊᐅᓚᑦᑎᓇᓱᓐᓂᕐᒥ 1940-ᖏᓐᓂ ᐊᒻᒪᓗ 1950-ᖏᓐᓂ ᐊᐅᓪᓚᐅᔾᔨᔪᒻᒪᕆᐅᕙᓚᐅᕐᓂᖏᓐᓂ ᐅᓄᖅᑐᓂ ᐃᓄᖕᓂ ᖃᓪᓗᓈᓄᑦ ᐅᒥᐊᕐᔪᐊᒃᑯᑦ ᐳᕙᓪᓗᓐᓇᖅᑐᒧᑦ ᐋᓐᓂᐊᕕᖕᓄᑦ ᑕᐅᓴᓐᑎᓂ ᑭᓛᒥᑕᓂ ᐅᖓᓯᒃᑐᒧᑦ ᐃᓚᒋᔭᒥᓂ ᐊᒻᒪᓗ ᓄᓇᓕᖏᓐᓂ. ᑕᐃᒃᑯᐊ ᐆᒪᐃᓐᓇᓚᐅᖅᑐᑦ ᐊᕐᕌᒍᒐᓵᓗᖕᓄᑦ ᐊᖏᕐᕋᓚᐅᙱᑦᑐᑦ. ᐃᓚᖏᓐᓄᑦ, ᖃᓄᐃᓕᖓᓕᕆᐊᒃᓴᖏᑦ ᐅᑎᓚᐅᙱᑦᑐᓄᑦ ᖃᐅᔨᒪᔭᐅᙱᑦᑐᑦ.

ᐃᓄᐃᑦ ᐊᒻᒪᓗ ᐃᓄᐃᑦ ᓄᓇᖕᒐᑦ

2016-ᒥ, 65,000-ᖏᓐᓃᐸᓗᓚᐅᖅᑐᑦ ᐃᓄᐃᑦ ᑲᓇᑕᒥᐅᑕᐅᔪᑦ. ᐱᖓᓱᓕᖅᑲᖓᔪᑦ ᑎᓴᒪᓂᒃ (72.8%) ᑕᐃᑲᓂᕐᒥᐅᑕᐅᔪᑦ ᑎᓴᒪᓂ ᐃᓄᐃᑦ ᓄᓇᖏᓐᓂ ᐊᕕᒃᑐᖅᓯᒪᔪᓂ ᑲᓇᑕᒥ, ᖃᐅᔨᒪᔭᐅᓪᓗᓂ ᐃᓄᐃᑦ ᓄᓇᖕᒐᑦ. ᐃᓄᐃᑦ ᓄᓇᖏᑦ ᐊᕕᒃᑐᖅᓯᒪᔪᑦ ᑖᒃᑯᐊᖑᔪᑦ ᐃᓄᕕᐊᓗᐃᑦ ᓄᓇᑦᓯᐊᕐᒥ, ᓄᓇᕗᑦ, ᓄᓇᕕᒃ (ᑯᐊᐸᒃ ᑕᕐᕋᖓᓂ), ᐊᒻᒪᓄ ᓄᓇᑦᓯᐊᕗᑦ (ᓛᐸᑐᐊ ᐅᐊᖕᓇᖓᓂ).

ᐊᔾᔨᒌᙱᓐᓂᖃᕐᔪᐊᕋᓗᐊᖅᑎᓪᓗᒍ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᖓᓂᖏᑦ ᐃᓄᐃᑦ ᓄᓇᖕᒐᓂ, ᐊᔾᔨᒌᐸᓗᒃᑐᓂ ᐱᑕᖃᐅᕐᒥᔪᖅ ᑕᒪᐃᓐᓂ ᑎᓴᒪᓂ ᐊᕕᒃᑐᖅᓯᒪᔪᓂ. ᑖᒃᑯᐊ ᐅᖃᖅᓯᒪᔪᑦ ᑭᒡᓕᓯᓂᐊᖅᑎᒃᑯᑦ ᑲᓇᑕᒥ, ᐃᓅᑯᑖᓂᐊᕐᓂᕐᒧᑦ ᓂᕆᐅᒋᔭᐅᔪᖅ ᐃᓄᖕᓄᑦ 10.5 ᐊᕐᕌᒍᓂ ᐊᑦᑎᓂᖅᓴᐅᔪᖅ ᑲᓇᑕᓕᒫᒥ ᑕᑯᖃᓯᐅᑎᓗᒍ; 52 ᐳᓴᓐᑎᖏᓐᓃᑦᑐᑦ ᐃᓄᐃᑦ ᐃᓄᒋᐊᓗᐊᖅᑐᓂ ᐃᒡᓗᒥᐅᖃᑎᒌᖑᔪᑦ; ᓂᕆᔭᒃᓴᖃᙱᓗᐊᕐᓂᖅ ᓇᒥᓕᒫᖅᑐᖅ; ᐊᒻᒪᓗ 52.5 ᐳᓴᓐᑎᖏᓐᓃᑦᑐᑦ ᐃᓄᐃᑦ ᐃᖅᑲᓇᐃᔮᒃᓴᖃᙱᑦᑐᑦ.

ᖃᓄᐃᓕᐅᖅᑐᖃᓕᕐᒪ?

ᑲᓇᑕᐅᑉ ᒐᕙᒪᖓ ᐊᖏᖅᓯᒪᔪᑦ ᐱᓕᕆᖃᑎᖃᕐᓂᕐᒥ ᑲᓇᑕᐅᑉ ᓂᒋᐊᓂ ᐊᒻᒪᓗ ᐅᑭᐅᖅᑕᖅᑐᖓᓂ ᐊᕕᒃᑐᖅᓯᒪᔪᓂ ᑲᑐᔾᔨᖃᑎᒌᓂ ᐊᒻᒪᓗ ᓄᓇᖃᖅᑳᖅᓯᒪᔪᓂ ᓯᕗᓕᖅᑎᓂ ᑲᒪᒋᔭᖃᕐᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ ᐊᒻᒪ ᐃᓅᓯᕐᒧᑦ−ᒪᑭᒪᐅᑏᓪᓗ ᐊᑦᑐᐃᖃᓯᐅᑎᔪᓂ ᐃᓄᐃᑦ ᐊᐃᑦᑐᕐᓗᖕᓇᖅᑐᖅ ᐳᕙᓪᓗᓐᓇᖅᑐᖃᒻᒪᕆᓐᓂᕆᔭᖏᓐᓂ.

2013-ᒥ, ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐋᖅᑭᒃᓱᐃᓚᐅᖅᑐᑦ ᑖᔅᓱᒥᖓ ᐃᓄᓐᓄ ᑐᕌᖓᔪᖅ ᐳᕙᓪᓗᓐᓇᖅᑐᒧᑦ ᐸᕐᓇᐅᑎ ᐅᔾᔨᕈᓱᓕᖅᑎᑦᑎᓂᕐᒥ ᐱᑕᖃᕆᐊᖃᕐᓂᖓ ᐃᑲᔫᑎᖃᕐᓂᖅᓴᐅᔪᓂ ᐱᓕᕆᔾᔪᓯᐅᔪᓂ ᐳᕙᓪᓗᓐᓇᖅᑐᖃᖅᑕᐃᓕᒪᑎᑦᓯᓂᕐᒥ, ᐊᐅᓚᑦᑎᓂᕐᒥ ᐊᒻᒪᓗ ᐸᖅᑭᒃᖠᓂᕐᒥ, ᐊᒻᒪᓗ ᓴᖅᑮᓂᕐᒥ ᐊᖅᑯᑎᒃᓴᒥᑦ ᓯᕗᒧᑦ ᒥᒃᖠᒋᐊᖅᑎᑦᑎᓂᕐᒥ ᐅᓄᕐᓂᖏᑦ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᖃᖅᑐᓂ ᑕᐃᑲᓂ ᐃᓄᐃᑦ ᓄᓇᖓᓂ.

ᑲᓇᑕᐅᑉ ᒐᕙᒪᖓ ᐊᒻᒪᓗ ᐃᓄᐃᑦ ᓯᕗᓕᖅᑏᑦ ᑲᑎᖃᑎᒌᓚᐅᖅᑐᑦ ᓯᑎᐱᕆ 2017-ᒥ ᐊᑖᒍᑦ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᕐᒧᑦ ᑲᑎᒪᔨᕋᓛᒃᑯᑦ ᐊᒻᒪᓗ ᐊᖏᖃᑎᒌᓚᐅᖅᑑᒃ ᓴᖅᑮᓂᕐᒥ ᑖᔅᓱᒥᖓ ᐱᓕᕆᔨᒻᒪᕆᖕᓂ ᐱᑕᖃᕈᓐᓃᖅᑎᑦᑎᓂᕐᒧᑦ ᐳᕙᓪᓗᓐᓇᖅᑐᒥ ᐃᓄᐃᑦ ᓄᓇᖕᒐᓕᒫᒥ. ᑲᔪᓯᑎᑦᑎᓂᕐᒧᑦ ᑲᒪᒋᔭᐅᓂᖓ ᑖᔅᓱᒧᖓ ᐱᑕᖃᕈᓐᓃᖅᑎᑦᑎᓂᕐᒧᑦ ᐱᓕᕆᐊᖑᔪᒥ, ᐊᒃᓱᕈᖅᓯᒪᔪᑦ ᑲᔪᓰᓐᓇᖅᖢᑎ ᑕᐃᑰᓇ ᐃᓄᐃᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᐅᖃᑎᒌᒃᑐᓄᑦ, ᑲᑎᒪᔨᕋᓛᒃᑲᓐᓂᐅᓪᓗᑎ ᑲᓇᑕᒥ ᐃᓄᐃᑦ ᑲᑎᒪᔨᕋᓛᖏᓐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ (NICoH), ᑲᑎᒪᔨᐅᔪᑦ ᐃᓕᓯᒪᔪᑦ ᐊᕐᕌᒍᒐᓴᖕᓄᑦ ᑭᒡᒐᖅᑐᐃᓪᓗᑎ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐊᒻᒪᓗ ᐃᓄᓕᒫᓄᑦ ᒐᕙᒪᒋᔭᐅᔪᓂ. ᐋᖅᑭᒃᑕᐅᓯᒪᓂᖏᑦ ᐊᖏᖅᑕᐅᓚᐅᖅᑐᖅ ᑖᒃᑯᓄᖓ ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᓐᓄᑦ ᓄᕕᐱᕆ, 2018-ᒥ.

ᐋᖅᑭᒃᑕᐅᓯᒪᓂᖏᑦ ᐊᑐᖅᑕᐅᓂᐊᖅᑐᑦ ᑐᓴᐅᒪᑎᑦᑎᓂᕐᒧᑦ ᐱᕙᓪᓕᐊᓂᕆᔭᖓᓂ ᐊᕕᒃᑐᖅᓯᒪᔪᓄᑦ ᑐᕌᖓᔪᓂ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᖃᓄᐃᓕᐅᕆᐊᕐᓂᕐᒧᑦ ᐸᕐᓇᐅᑎᓄᑦ ᑎᓴᒪᓄᑦ ᐃᓄᐃᑦ ᐊᕕᒃᑐᖅᓯᒪᓂᖏᓐᓂ. ᑖᒃᑯᐊ ᖃᓄᐃᓕᐅᕆᐊᕐᓂᕐᒧᑦ ᐸᕐᓇᐅᑏᑦ, ᓂᕆᐅᒋᔭᐅᔪᑦ ᐱᔭᕇᖅᑕᐅᓯᒪᓛᖅᑐᑦ ᐊᒻᒪᓗ ᐊᑐᓕᖅᑎᑕᐅᓗᑎ ᑎᑭᓪᓗᒍ ᒫᔾᔨ, 2019, ᓇᓗᓇᐃᕆᓂᐊᖅᑐᑦ ᐱᓪᓚᑦᑖᓂ ᐱᓕᕆᐊᖑᓂᐊᖅᑐᓂ, ᓲᕐᓗ ᓴᙱᓂᖅᓴᐅᓕᖅᑎᑦᑎᓂᕐᒥ ᓄᓇᓕᖕᓂ ᑐᙵᕕᖃᕐᓂᕐᒥ ᐃᓐᓄᒃᓱᐃᓂᕐᒥ ᐅᔾᔨᕈᓱᓕᖅᑎᑦᑎᒃᑲᓐᓂᓂᕐᒥ ᐊᒻᒪᓗ ᑐᑭᓯᐅᒪᓕᖅᑎᑦᑎᓂᕐᒥ ᐳᕙᓪᓗᓐᓇᖅᑐᒥ, ᐊᑭᕋᖅᑐᖅᑕᐅᙱᓐᓂᖅᓴᐅᓗᑎ, ᐊᒻᒪᓗ ᓱᖅᑯᐃᔭᐅᓵᓕᕙᒡᓗᑎ ᐊᒻᒪᓗ ᒪᒥᓴᖅᑕᐅᕙᒡᓗᑎ ᐊᐃᑦᑐᕐᓗᖕᓇᖅᑐᖅᒧᑦ ᐳᕙᓪᓗᓐᓇᖅᑐᒧᑦ ᐋᓐᓂᐊᒧᑦ ᐊᒻᒪᓗ ᐊᐃᑦᑐᕐᓗᖕᓇᙱᑦᑐᒧᑦ ᐳᕙᓪᓗᓐᓇᖅᑑᑉ ᐋᓐᓂᐊᖓᓂ.

ᑕᐃᒫᒃ ᐅᖃᐅᓯᐅᓚᕐᒪ ᑮᓇᐅᔭᑦ ᐊᑐᖅᑐᒃᓴᓂ 2018-ᒥ, ᑲᓇᑕᐅᑉ ᒐᕙᒪᖓ ᑮᓇᐅᔭᖃᖅᑎᑦᑎᓂᐊᖅᑐᖅ $27.5 ᒥᓕᔭᓐᓂᒃ ᐊᕐᕌᒍᓄᑦ ᑕᓪᓕᒪᓄᑦ ᐃᓄᐃᑦ ᑕᐱᕇᑦ ᑲᓇᑕᒥ ᐃᓄᖕᓄᑦ ᑐᕌᖓᔪᒥ ᐱᓕᕆᓂᐅᔪᒥ ᐳᕙᓪᓗᓐᓇᖅᑐᒥ ᐱᑕᖃᕈᓐᓃᖅᑎᑦᑎᓂᕐᒧᑦ ᐃᓄᐃᑦ ᓄᓇᖕᒐᓂ. ᑕᒪᓐᓇ ᖄᒃᑲᓐᓂᐊᒎᖓᔪᖅ $400 ᒥᓕᔭᓐᓄᑦ ᐊᕐᕌᒍᓄᑦ ᖁᓕᓄᑦ ᐃᓄᖕᓄᑦ ᓯᕗᓕᖅᑎᖃᕐᓗᑎ ᐃᒡᓗᓕᕆᓂᕐᒧᑦ ᐸᕐᓇᐅᑎᓕᐅᕐᓂᕐᒧᑦ ᐃᓄᐃᑦ ᐊᕕᒃᑐᖅᓯᒪᔪᑦ ᓄᓇᖏᓐᓂ ᓄᓇᕕᖕᒥ, ᓄᓇᑦᓯᐊᕗᒻᒥ ᐊᒻᒪᓗ ᐃᓄᕕᐊᓗᒻᒥ. ᑮᓇᐅᔭᕐᓂᒃ ᐊᑐᖅᑐᒃᓴᓂ 2017-ᒥ ᐅᖃᐅᓯᐅᓚᐅᖅᑐᖅ $240 ᒥᓕᔭᓐᓄᑦ ᐊᕐᕌᒍᓄᑦ ᖁᓕᓄᑦ ᐃᑲᔪᖅᓱᕈᒪᓪᓗᑎ ᐃᒡᓗᓕᕆᓂᐅᔪᒥᑦ ᓄᓇᕘᒥ.

2030-ᒥ ᑐᕌᒐᕆᔭᐅᔪᖅ

ᒫᔾᔨ 23, 2018-ᒥ, ᒥᓂᔅᑕ ᕕᓪᐹᑦ, ᐊᒻᒪ ᐊᖓᔪᖅᑳᕆᔭᐅᔪᖅ ᐃᓄᐃᑦ ᑕᐱᕇᑦ ᑲᓇᑕᒥ ᓇᑖᓐ ᐆᐱᑦ ᐅᖃᖅᑐᐃᓐᓇᐅᕘᒃ ᐊᖏᖅᓯᒪᓂᕆᔭᖏᓐᓂᒃ ᐳᕙᓪᓗᓐᓇᖅᑐᖃᕈᓐᓃᖅᑎᑦᓯᓂᕐᒥ ᐃᓄᐃᑦ ᓄᓇᓕᒫᖓᓂ ᑎᑭᓪᓗᒍ 2030, ᐊᒻᒪ ᐊᐃᑦᑑᑕᐅᓲᒥᑦ ᐳᕙᓪᓗᓐᓇᖅᑐᒥ ᐱᑕᖃᕈᓐᓃᕐᔫᒥᓗᓂ 50 ᐳᓴᓐᑎᒥ ᑎᑭᓪᓗᒍ 2025. ᐱᓕᕆᐊᖃᖅᑐᑦ ᒫᓐᓇᐅᔪᖅ ᐊᑐᓂ ᑎᓴᒪᓂ ᐃᓄᐃᑦ ᓄᓇᖏᑕ ᐊᕕᒃᑐᖅᓯᒪᓂᖏᓐᓂ ᐅᖃᐅᓯᖃᕐᓱᑎᒃ ᐊᖏᓗᐊᕐᓂᐊᓂᒃ ᐳᕙᓪᓗᓂᐅᑉ ᐃᓄᐃᑦ ᓄᓇᖏᓐᓂ ᐅᑯᐊ ᐱᖃᓯᐅᑎᓪᓗᒋᑦ: ᐋᖅᑭᒃᓱᐃᓂᕐᒧᑦ ᐊᕕᒃᑐᖅᓯᒪᔪᓄᑦ ᑐᕌᖓᔪᓂ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᖃᓄᐃᓕᐅᕆᐊᕐᓂᕐᒧᑦ ᐸᕐᓇᐅᑎᓂ.

ᓄᓇᖃᖅᑳᖅᑐᓄᑦ ᐱᔨᑦᑎᕋᑦᑎᒃᑯᑦ ᑲᓇᑕᒥ ᒫᓐᓇᕈᓘᓚᐅᖅᑐᖅ ᐱᓕᕆᐊᖃᖅᓯᒪᔪᑦ ᐅᓄᖅᑐᓂ ᖃᓄᐃᓕᐅᕆᐊᕈᑎᓂ ᐃᓄᖕᓂ ᑲᑐᔾᔨᖃᑎᒋᔭᐅᔪᓂ ᑲᒪᒋᔭᖃᕐᓂᕐᒧᑦ ᐅᓄᖅᑐᐊᓘᓐᓂᖏᓐᓄᑦ ᐳᕙᓪᓗᓐᓇᖅᑐᖃᕐᓂᖏᓐᓄᑦ ᐃᓅᔪᑦ ᐃᓄᐃᑦ ᓄᓇᖕᒐᓂ ᑖᒃᑯᐊᓗ:

• ᑮᓇᐅᔭᑦ
  • ᐊᑐᐃᓐᓇᐅᑎᑦᑎᓂᕐᒥ ᑮᓇᐅᔭᓕᕆᓂᕐᒧᑦ ᐊᒻᒪᓗ ᐃᓄᖕᓄᑦ ᐃᑲᔫᑎᒃᓴᓂ ᐃᑲᔪᖅᓱᓂᕐᒥᑦ ᓯᐊᒻᒪᒃᐸᓪᓕᐊᔪᓂ ᑲᒪᒋᔭᖃᕐᓂᕐᒧᑦ ᖃᓄᐃᓕᐅᕈᑎᒃᓴᓂ.
  • ᐱᓕᕆᖃᑎᖃᕐᓂᕐᒥ ᐃᓄᖕᓂ ᑲᑐᔾᔨᖃᑎᒌᖑᔪᓂ ᐊᑐᓕᖅᑎᑦᑎᓂᕐᒥ ᑮᓇᐅᔭᕐᓂᒃ ᐊᑐᖅᑐᒃᓴᓂ 2018-ᒥ ᑮᓇᐅᔭᑦ $27.5 ᒥᓕᔭᓐ ᐊᕐᕌᒍᓄᑦ ᑕᓪᓕᒪᓄᑦ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᐃᓄᐃᑦ ᓄᓇᖕᒐᓂ.
• ᓱᖅᑯᐃᖅᓯᓂᖅ ᐊᒻᒪᓗ ᒪᒥᓴᐃᓂᖅ
  • ᑮᓇᐅᔭᖃᖅᑎᑦᑎᓂᕐᒥ ᓂᐅᕕᕐᓂᕐᒧᑦ ᓱᒃᑲᓕᔪᒥ ᐳᕙᓪᓗᓐᓇᖅᑐᒥ ᓱᖅᑯᐃᖅᓯᓂᕐᒧᑦ ᐅᓪᓗᒥᓯᐅᑎᓂ ᓄᓇᕗᒻᒧ.
  • ᐃᓚᓯᓂᕐᒥ ᕆᕙᐸᑏᓐᒥ ᑎᑎᕋᖅᓯᒪᔪᓄᑦ ᐃᓅᓕᓴᐅᑎᓄᑦ ᑐᐊᕕᕐᓇᖅᑐᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔭᐅᔭᕆᐊᖃᕐᓂᖓ, ᓄᑖᖑᔪᖅ ᒪᓕᒋᐊᓕᖕᓄᑦ ᐊᖅᑯᑎᒃᓴᖅ ᐊᑐᐃᓐᓇᖃᕐᕕᐅᓂᕐᒧᑦ ᐃᓅᓕᓴᐅᑎᓄᑦ ᒫᓐᓇᐅᔪᖅ ᓚᐃᓴᓐᓯᖃᙱᑦᑐᓄᑦ ᑲᓇᑕᒥ. ᒐᕙᒪᒃᑯᑦ ᕿᓚᒻᒥᐅᓛᒃᑯᑦ ᐊᑐᐃᓐᓇᖃᖅᑎᑦᑎᓚᐅᖅᑐᑦ ᑖᔅᓱᒥᖓ ᕆᕙᐸᑏᓐᒥ, ᓇᐃᓐᓂᖅᓴᒥ ᐊᑐᖅᑕᐅᓲᖅ ᒪᒥᓴᐃᓂᕐᒧᑦ ᐊᐃᑦᑐᕐᓗᖕᓇᙱᑦᑐᒧᑦ ᐳᕙᓪᓗᓐᓇᖅᑐᒧᑦ.
  • ᐱᓕᕆᖃᑎᖃᕐᓂᕐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᓱᒃᑲᓕᔪᒥ ᑎᑭᑎᑦᓯᒍᓐᓇᕐᓂᕐᒥ ᕆᕙᐸᑏᓐᒥ.
  • ᐃᑲᔪᖅᓱᓂᕐᒥ ᑕᐃᑲᒥ ᐳᕙᓪᓗᓐᓇᖅᑐᖅ 3HP ᐱᓕᕆᐊᒃᓴᖅ, ᐱᓕᕆᐊᖑᔪᖅ ᓄᓇᕗᒻᒥ ᖃᐅᔨᓴᕐᓂᕐᒧᑦ ᐊᑭᖓᓄᑦ ᐃᑲᔫᑎᖃᕐᒪᖔᖅ ᑖᓐᓇ 3HP (ᐃᓚᖃᖅᑐᖅ ᒪᒥᓴᐃᓂᕐᒥ ᑲᑎᖅᓱᐃᓂᕐᒥ ᑖᒃᑯᓂᖓ ᕆᕙᐸᑏᓐᒥ ᐊᒻᒪᓗ ᐊᐃᓱᓇᐃᔨᑦ) ᐊᐃᑦᑐᕐᓗᖕᓇᙱᑦᑐᒧᑦ ᐳᕙᓪᓗᓐᓇᖅᑐᒧᖅ ᐃᓄᖕᓄᑦ ᐅᓗᕆᐊᓇᖅᑐᒦᓐᓂᖅᓴᐅᔪᓄᑦ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᖅᑖᖁᓇᒋᑦ.
• ᑲᑐᔾᔨᖃᑎᒌᓐᓂᒃᑯᑦ
  • ᐋᖅᑭᒃᓱᐃᓂᕐᒥ ᐳᕙᓪᓗᓐᓇᖅᑐᒧᑦ ᐱᓕᕆᔨᐅᖃᑎᒌᒃᑐᓂ, ᐃᓚᖃᕐᓗᑎ ᑭᒡᒐᖅᑐᐃᔨᓂ ᓄᓇᕗᑦ ᒐᕙᒪᒃᑯᖏᓐᓂ, ᓄᓇᖃᖅᑳᖅᑐᓄᑦ ᐱᔨᑦᑎᕋᑦᑎᒃᑯᑦ ᑲᓇᑕᒥ ᐊᒻᒪᓗ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑎᒥᖓᑦᑕ ᑲᓇᑕᒥ, ᐱᓕᕆᖃᑎᒌᓐᓂᕐᒧᑦ ᒐᕙᒪᑐᖃᒃᑯᑦ ᐱᓕᕆᐊᕆᓇᓱᒃᑕᖏᓐᓂ ᓇᐅᑦᑎᖅᓱᕐᓂᕐᒥ, ᖃᐅᔨᓴᕐᓂᕐᒥ, ᒪᒥᓴᐃᓂᕐᒥ, ᑐᓴᖅᑎᑦᑎᓂᕐᒥ ᐊᒻᒪᓗ ᐅᔾᔨᕈᓱᓕᖅᑎᑦᑎᓂᕐᒥ, ᐊᒻᒪᓗ ᖃᓄᐃᓕᐅᕆᐊᕐᓂᕐᒧᑦ ᑲᒪᒋᔭᖃᕐᓂᕐᒧᑦ ᐅᓗᕆᐊᓇᕈᑎᐅᔪᓂ ᐳᕙᓪᓗᓐᓇᖅᑐᒧᑦ.
  • ᐱᓕᕆᖃᑎᖃᕐᓂᕐᒥ ᓄᓇᑦᓯᐊᕗᑦ ᐊᒻᒪᓗ ᓂᐅᐸᐅᓐᓛᓐ ᐊᒻᒪᓗ ᓛᐸᑐᐊ ᒐᕙᒪᖏᓐᓂ ᐃᑲᔪᖅᓱᓂᕐᒧᑦ ᐊᒃᓱᕈᕈᑕᐅᔪᓄᑦ ᑲᒪᒋᔭᖃᕐᓂᕐᒧᑦ ᒫᓐᓇᕈᓘᓚᐅᖅᑐᖅ ᐳᕙᓪᓗᓐᓇᖅᑐᖅ ᓯᐊᒻᒪᒍᑕᐅᑎᓪᓗᒍ ᑖᕙᓂ ᐊᕕᒃᑐᖅᓯᒪᔪᒥ.
  • ᐱᓕᕆᖃᑎᖃᕐᓂᕐᒥ ᐃᓄᐃᑦ ᓯᕗᓕᖅᑎᖏᓐᓂ ᑖᔅᓱᒧᖓ ᓇᓂᓚᕗᑦ ᐱᒋᐊᕈᑎᒃᓴᖓᓄᑦ, ᐱᒋᐊᕈᑎᖃᖅᑐᖅ ᑲᒪᒋᔭᖃᕐᓂᕐᒧᑦ ᐋᓐᓂᕈᑕᐅᓯᒪᔪᓂ ᒐᕙᒪᑐᖃᒃᑯᑦ ᐱᓕᕆᓂᕆᓚᐅᖅᑕᖓᓂ ᐳᕙᓪᓗᓐᓇᖅᑐᖅᑕᖃᒻᒪᕆᒃᑎᓪᓗᒍ ᑕᐃᑲᓂ 1940-ᖏᓐᓂ 1960-ᖏᓐᓄ.

ᐃᖏᕐᕋᓂᕆᔭᖓ

2013 – ᐃᓄᐃᑦ ᑕᐱᕇᑦ ᑲᓇᑕᒥ ᐋᖅᑭᒃᓱᐃᔪᑦ ᑖᔅᓱᒥᖓ ᐃᓄᓐᓄ ᑐᕌᖓᔪᖅ ᐳᕙᓪᓗᓐᓇᖅᑐᒧᑦ ᐸᕐᓇᐅᑎ

ᕖᕝᕗᖓᓕ 2017 – ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᕐᒧᑦ ᑲᑎᒪᔨᕋᓛᑦ ᓴᖅᑭᑕᐅᔪᑦ

ᔫᓂ 2017 – ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᓇᑕᒥ ᒪᓕᒋᐊᓕᖕᓄᑦ ᐊᖅᑯᑎᒃᓴᖅ ᑐᐊᕕᕐᓇᖅᑐᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓅᓕᓴᐅᑎᓄᑦ ᐱᒋᐊᖅᑎᑕᐅᓚᐅᖅᑐᖅ; ᕆᕙᐸᑏᓐ (ᓇᐃᓈᖅᓯᒪᔪᖅ ᐃᓕᓐᓂᐊᕈᑎᒃᓴᖅ ᐊᐃᑦᑐᕐᓗᖕᓇᙱᑦᑐᒧᑦ ᐳᕙᓪᓗᓐᓇᖅᑑᑉ ᐊᓂᐊᖓᓄᑦ ᒪᒥᓴᐃᓂᖅ) ᐃᓚᔭᐅᓚᐅᖅᑐᖅ ᑎᑎᕋᖅᓯᒪᔪᓄᑦ ᔫᓂ 2017 ᓄᙳᖏᓐᓂ

ᓄᕕᐱᕆ 2017 – ᐱᓕᕆᔨᒻᒪᕆᒃᑯᑦ ᓴᖅᑭᑕᐅᓚᐅᖅᑐᑦ ᑐᓴᐅᒪᑎᑦᑎᓂᕐᒧᑦ ᐱᕙᓪᓕᐊᑎᑕᐅᓂᖓᓄᑦ ᐋᖅᑭᒃᑕᐅᓯᒪᓂᖏᑦ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᐃᓄᐃᑦ ᓄᓇᖓᓕᒫᒥ; ᐱᓕᕆᐊᕆᔭᐅᔪᑦ ᐃᓚᓕᐅᔾᔭᐅᓚᐅᖅᑐᑦ ᑕᐃᑯᖓ ᓴᖅᑭᔮᖅᑐᒧᑦ ᐃᓄᖕᓄᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒻᒪᕆᖕᓄᑦ ᑕᐃᑲᓂ ᒪᐃ 2018-ᒥ

ᕖᕝᕗᐊᓕ 27, 2018 – ᑮᓇᐅᔭᑦ ᐊᑐᖅᑐᒃᓴᑦ 2017 ᐊᒻᒪᓗ 2018 ᑐᓴᖅᑎᑦᑎᓚᐅᖅᑐᑦ ᑲᑎᓕᒫᖅᖢᒋᑦ $640 ᒥᓕᔭᓐᓂᒃ ᐊᕐᕌᒍᓄᑦ ᖁᓕᓄᑦ ᑲᒪᒋᔭᖃᕐᓂᕐᒧᑦ ᐃᒡᓗᑭᒃᓴᓗᐊᕐᓂᖏᓐᓄᑦ ᐃᓄᐃᑦ ᓄᓇᖕᒐᓂ, ᐊᒻᒪᓗ $27.5 ᒥᓕᔭᓐᓂᒃ ᐊᕐᕌᒍᓄᑦ ᑕᓪᓕᒪᓄᑦ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᐃᓄᐃᑦ ᓄᓇᖓᓂ

ᕖᕝᕗᐊᓕ – ᒫᔾᔨ March 2018 ᓯᕗᓪᓕᖅᐹᒥ ᑎᑭᑕᐅᔪᑦ ᓄᓇᓕᖕᓄᑦ ᐳᕙᓪᓗᓐᓇᖅᑐᒧᑦ ᖃᐅᔨᓴᕐᓂᕐᒧᑦ ᐋᓐᓂᐊᖅᑐᓕᕆᔩᑦ ᓄᓇᕘᒥ

ᕖᕝᕗᐊᓕ 2018 – ᓄᓇᕕᒻᒥ, ᒐᕙᒪᑐᖃᒃᑯᑦ-ᓂᒋᐊᓂ ᐊᕕᒃᑐᖅᓯᒪᔪᓂ ᑲᑐᔾᔨᖃᑎᒌᖕᓂᖏᑦ ᐱᕙᓪᓕᐊᕈᑕᐅᓯᒪᔪᖅ ᐃᓕᓐᓂᐊᕈᑎᒃᓴᒥ ᐋᓐᓂᐊᓯᐅᖅᑎᓄᑦ ᐃᓄᐃᑦ ᓄᓇᓕᖏᓐᓂ ᐃᖅᑲᓇᐃᔭᖅᑐᓄᑦ. ᐱᓕᕆᐊᖑᔪᖅ ᑲᒪᒋᔭᖃᓲᖅ ᐳᕙᓪᓗᓂᕐᒧᑦ ᐃᑲᔪᕈᑎᑦᓴᓂᒃ ᐋᖅᑭᒃᓱᐃᓂᒃᑯᑦ ᒪᒃᑯᑦᑐᑦ ᑐᑭᓯᐊᓂᕐᓴᐅᖁᓪᓗᒋᑦ ᐳᕙᓪᓗᓂᐅᑉ ᒥᒃᓵᓄᑦ ᐊᒻᒪ ᑲᒪᒋᔭᖃᒃᑲᓂᕐᓱᑎᒃ ᓗᑦᑕᓂᒃ ᑎᑭᑦᑕᑐᓂᒃ.

ᒫᔾᔨ 23, 2018 – ᑲᑐᔾᔨᖃᑎᒌᓐᓂᒃᑯᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ISC-ᒃᑯᑦ ᐊᖏᖃᑎᒌᒃᑐᑦ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᐃᓄᖕᓂ ᑖᕙᓂᕐᒥᐅᑕᐅᔪᓂ ᐃᓄᐃᑦ ᓄᓇᖕᒐᓂ ᑎᑭᓪᓗᒍ 2030 ᐅᖃᐅᓯᐅᓚᐅᖅᑐᖅ ᓄᓇᕐᔪᐊᕐᒥ ᐳᕙᓪᓗᓐᓇᖅᑐᖅ ᐅᓪᓗᖓᓂ

ᐊᐃᕐᕆᓕ 2018 – ᑎᑭᑎᑕᐅᖃᑦᑕᖅᑐᑦ ᓄᓇᓕᖕᓄᑦ ᐳᕙᓪᓗᓐᓇᖅᑐᒧᑦ ᖃᐅᔨᓴᖅᑏᑦ ᑎᑭᑎᑕᐅᔪᑦ ᓄᓇᑦᓯᐊᕗᒻᒧᑦ

ᓯᑎᐱᕆ 2018 – ᓯᕗᓪᓕᖅᐹᑦᓯᐊᒥ ᓄᓇᕐᔪᐊᕐᒥᐅᓕᒫᓄᑦ ᑲᑎᒪᔩᑦ ᖁᑦᑎᖕᓂᖅᐹᒥ ᑲᑎᒪᑎᑦᑎᓚᐅᖅᑐᑦ ᐳᕙᓪᓗᓐᓇᖅᑐᒧᑦ. ᑲᓇᑕᒥᙶᖅᑐᑦ ᐊᒻᒪᓗ ᐃᓄᐃᑦ ᓯᕗᓕᖅᑏᑦ ᓄᓇᕐᔪᐊᕐᒥ ᖃᓄᐃᓕᐅᕆᐊᖁᔨᓚᐅᖅᑐᑦ ᐃᑲᔪᖅᑕᐅᓗᑎ ᑮᓇᐅᔭᕐᓄᑦ.

ᐅᑐᐱᕆ – ᓄᕕᐱᕆ 2018 – ᑭᖑᓂᖓᓂ ᑎᑭᑎᑕᐅᔪᑦ ᐋᓐᓂᐊᖅᑐᓕᕆᔩᑦ ᓄᓇᕗᒻᒧ

ᑎᓯᐱᕆ 2018 – ᐃᓄᐃᑦ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᐋᖅᑭᒃᑕᐅᓯᒪᓂᖏᑦ ᓴᖅᑭᑕᐅᔪᑦ

ᓱᓕᔪᑦ ᐊᒻᒪᓗ ᓈᓴᐅᑏᑦ

• ᐳᕙᓪᓗᓐᓇᖅᑐᖅ ᐊᒃᑐᐃᓂᖃᓲᖅ ᐅᖓᑖᓄᑦ 10 ᒥᓕᔭᓐᓂᒃ ᐃᓄᖕᓂ ᓄᓇᕐᔪᐊᓕᒫᒥ ᐊᕐᕌᒍᑕᒫᑦ.
• 2016-ᒥ:
  • ᐱᑕᖃᓚᐅᖅᑐᖅ 1,737-ᓂᒃ ᐊᑐᓂ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᖃᖅᑐᓂ ᑲᓇᑕᒥ ᑕᒪᓐᓇ ᑐᑭᖃᖅᑐᖅ ᐱᑕᖃᕐᓂᖓ ᐅᓄᕐᓂᖏᑦ 4.8-ᖑᔪᑦ ᐊᑐᓂ 100,000-ᓂᒃ ᐃᓄᒋᐊᕐᓂᐅᔪᓂ.
  • ᐅᓂᒃᑲᐅᓯᕆᔭᐅᓯᒪᔪᑦ ᐱᑕᖃᕐᓂᖓᓄᑦ ᐅᓄᕐᓂᖏᑦ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᖃᕐᓂᖓ ᑲᓇᑕᒥ ᐃᓅᓂᑰᔪᓂ, ᓄᓇᖃᖅᑳᖅᓯᒪᙱᑦᑐᓂ ᐅᓄᕐᓂᖏᑦ 0.6-ᖑᔪᑦ ᐊᑐᓂ 100,000-ᓂᒃ ᐃᓄᒋᐊᕐᓂᐅᔪᓂ
  • ᐅᓂᒃᑲᐅᓯᕆᔭᐅᓯᒪᔪᑦ ᐱᑕᖃᕐᓂᖓᓄᑦ ᐅᓄᕐᓂᖏᑦ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᖃᕐᓂᖓ ᐃᓄᖕᓂ ᐃᓄᐃᑦ ᓄᓇᖕᒐᓂᕐᒥᐅᑕᐅᔪᓂ ᐅᓄᕐᓂᖏᑦ 170.1-ᖑᔪᑦ ᐊᑐᓂ 100,000-ᓂᒃ ᐃᓄᒋᐊᕐᓂᐅᔪᓂ, ᐅᓄᕐᓂᖅᓴᐅᔪᖅ 300-ᖏᖅᓱᕐᓗᒍ ᐅᓄᕐᓂᖏᓐᓂ ᐅᓂᒃᑲᐅᓯᕆᔭᐅᓯᒪᔪᓂ ᑲᓇᑕᒥ ᐃᓅᓂᑰᔪᓂ, ᓄᓇᖃᖅᑳᖅᓯᒪᙱᑦᑐᓄᑦ ᑕᐃᑲᓂᔅᓴᐃᓐᓇᖅ ᐊᕐᕌᒍᒥ.

ᑲᓲᒪᕝᕖᑦ ᑐᕌᖓᖃᓯᐅᑎᔪᑦ

• ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑎᒥᖓᑦᑕ ᑲᓇᑕᒥ − ᐳᕙᓪᓗᓐᓇᖅᑐᖅ(TB)
• ᐱᕙᓪᓕᐊᔪᑦ ᓴᖅᑭᑕᐅᔪᑦ: ᐳᕙᓪᓗᓐᓇᖅᑐᒧᑦ ᐱᓕᕆᔨᒻᒪᕆᒃᑯᑦ
• ᑲᓇᑕᒥ ᐊᐃᑐᕐᓗᓐᓇᖅᑐᓄᑦ ᐋᓐᓂᐊᓄᑦ ᐅᓂᒃᑳᖅ: ᐳᕙᓪᓗᓐᓇᖅᑐᖃᕈᓐᓃᖅᑎᑦᓯᒍᓐᓇᖅᐱᑕ?
• ᐃᓄᓐᓄ ᑐᕌᖓᔪᖅ ᐳᕙᓪᓗᓐᓇᖅᑐᒧᑦ ᐸᕐᓇᐅᑎ
• ᐱᕙᓪᓕᐊᔪᑦ ᓴᖅᑭᑕᐅᔪᑦ: ᐃᓄᐃᑦ ᓯᕗᓕᖅᑏᑦ ᐃᓄᐃᑦ ᓄᓇᖓᓂ ᐊᒻᒪᓗ ᑕᓪᓕᒪᑦ ᒐᕙᒪᑐᖃᒃᑯᓐᓂ ᒥᓂᔅᑕᐅᔪᑦ ᑲᔪᓰᓐᓇᖅᑐᒥ ᐱᓕᕆᐊᖃᕐᓂᖏᑦ ᑖᒃᑯᓄᖓ ᐃᓄᐃᑦ ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᕐᒧᑦ ᑲᑎᒪᔨᕋᓛᑦ
• ᐅᖃᐅᓯᒃᓴᕆᔭᖏᑦ ᑖᔅᓱᒪ ᒪᓕᒐᓕᐅᖅᑎᕐᔪᐊᖅ ᔭᐃᓐ ᕕᓪᐹᑦ, ᒥᓂᔅᑕ ᓄᓇᖃᖅᑳᖅᑐᓄᑦ ᐱᔨᑦᑎᕋᑦᑎᒃᑯᓐᓄ – ᑲᑐᔾᔨᖃᑎᒌᓐᓂᖅ ᐃᓱᒪᒋᔪᓐᓇᐃᖅᓯᓂᕐᒧᑦ: ᐃᓕᓴᖅᓯᓂᕐᒥ ᐊᒻᒪᓗ ᐃᒃᐱᒍᓱᑦᑎᐊᕐᓂᕐᒥ ᓄᓇᖃᖅᑳᖅᓯᒪᔪᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ
• ᐃᓅᓯᕐᒧᑦ ᐊᔾᔨᒌᙱᑎᑕᐅᓂᕐᒧᑦ ᓇᓗᓇᐃᔭᐅᑎ
• ᑲᓇᑕᐅᑉ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑕ ᐅᓂᒃᑳᓕᐊᖓ