ᓱᒋᐊᓪᓚᕈᑎᒃᓴᐃᑦ ᐃᑯᓪᓚᐅᒥᑎᑦᓯᒋᐊᕐᓂᒧᑦ ᐳᕙᓪᓗᓂᕐᒥᒃ ᐃᓄᐃᑦ ᓄᓇᓕᒫᖏᓐᓂ

ᑎᓯᐱᕆ 10, 2018 – ᐋᑐᐋ, ᐋᓐᑎᐅᕆᐅ – ᓄᓇᖃᖅᑳᖅᑐᓄᑦ ᐱᔨᑦᑎᕋᑦᑎᒃᑯᑦ ᑲᓇᑕᒥ

ᐅᓪᓗᒥ, ᑖᒃᑯᐊ, ᐃᓄᐃᑦ ᐳᕙᓪᓗᓐᓇᖅᑐᒥ ᐱᑕᖃᕈᓐᓃᖅᑎᑦᑎᓂᕐᒧᑦ ᐋᖅᑭᒃᑕᐅᓯᒪᓂᖏᑦ ᓴᖅᑭᑕᐅᖅᑲᐅᔪᑦ ᑖᒃᑯᓄᖓ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂ ᑭᖑᓪᓕᕐᒥ ᐱᓕᕆᐊᖃᕐᓂᕐᒧᑦ ᑲᔪᓰᓐᓇᖅᑐᒥ ᐊᒃᓱᕈᕈᑕᐅᔪᒥ ᑲᒪᒋᔭᖃᕐᓂᕐᒧᑦ ᐅᓄᖅᑐᒻᒪᕆᐊᓗᖕᓂ ᐳᕙᓪᓗᓐᓇᖅᑐᖃᕐᓂᖏᓐᓄᑦ (TB) ᐃᓄᖕᓂ ᑕᐃᑲᓇᕐᒥᐅᑕᐅᔪᓂ ᐃᓄᐃᑦ ᓄᓇᖕᒐᓂ. 2016-ᒥ, ᐅᓂᒃᑲᐅᓯᕆᔭᐅᓚᐅᖅᑐᖅ ᐃᓄᒋᐊᕐᓂᖏᑦ ᐊᐃᑦᑐᕐᓗᖕᓇᖅᑐᒥ ᐳᕙᓪᓗᓐᓇᖅᑐᖃᖅᑐᖃᕐᓂᖏᑦ ᐃᓄᖕᓂᑦ ᑕᐃᑲᓂᕐᒥᐅᖑᔪᓂ ᐃᓄᐃᑦ ᓄᓇᖕᒐᓂ ᐅᖓᑖᓅᖓᓚᐅᖅᑐᖅ 300-ᖏᖅᓱᕐᓗᒍ ᑕᐃᒃᑯᓂᖓ ᑲᓇᑕᒥ ᐃᓅᓂᑯᓂ, ᓄᓇᖃᖅᑳᖅᓯᒪᙱᑦᑐᓂ.

ᐋᖅᑭᒃᑕᐅᓯᒪᓂᖏᑦ ᓴᖅᑭᑎᑕᐅᓂᖓ ᒪᓕᒃᓴᖅᑐᖅ ᐅᖃᐅᓯᐅᓚᐅᖅᑐᒥ 2017 ᓄᙳᖏᓐᓂ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᖓᔪᖅᑳᖅ ᓇᐃᑕᓐ ᐆᐱᐊᑦ ᐊᒻᒪᓗ ᒪᓕᒐᓕᐅᖅᑎᕐᔪᐊᖅ ᔭᐃᓐ ᕕᓪᐹᑦ, ᒥᓂᔅᑕ ᓄᓇᖃᖅᑳᖅᑐᓄᑦ ᐱᔨᑦᑎᕋᑦᑎᒃᑯᓐᓄ, ᓴᖅᑮᓂᕐᒧᑦ ᐃᓄᐃᑦ ᐳᕙᓪᓗᓐᓇᖅᑐᒧᑦ ᐱᓕᕆᔨᒻᒪᕆᖕᓂ, ᐊᒻᒪᓗ ᑲᑐᔾᔨᖃᑎᒌᓐᓂᒃᑯᑦ ᐊᖏᕈᑕᐅᓚᐅᖅᑐᒥ ᒫᔾᔨ 2018-ᒥ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᐃᓄᖕᓂ ᑕᐃᑲᓂᕐᒥᐅᑕᐅᔪᓂ ᐃᓄᐃᑦ ᓄᓇᖕᒐᓂ ᑎᑭᓪᓗᒍ 2030, ᐱᒋᐊᕈᑕᐅᓗᓂ ᒥᒃᖠᒋᐊᖅᑎᑦᑎᓂᕐᒧᑦ ᐅᓂᒃᑲᐅᓯᕆᔭᐅᔪᓂᑦ ᐅᓄᕐᓂᖏᓄᑦ ᐊᐃᑦᑐᕐᓗᖕᓇᖅᑐᒧᑦ ᐳᕙᓪᓗᓐᓇᖅᑐᒧᑦ ᐊᑦᑎᓂᖅᐹᒥ 50 ᐳᓇᓐᑎᒥ ᑎᑭᓪᓗᒍ 2025.

ᐋᖅᑭᒃᑕᐅᓯᒪᓂᖏᑦ ᑐᕌᖓᔪᑦ ᐅᖃᐅᓯᕆᔭᐅᓚᐅᖅᑐᓂ ᐊᒻᒪᓗ ᐃᑲᔪᖅᑕᐅᓪᓗᑎ ᐃᓄᐃᑦ ᐳᕙᓪᓗᓐᓇᖅᑐᒧᑦ ᐱᓕᕆᔨᒻᒪᕆᖕᓂ ᐊᒻᒪᓗ ᐃᓄᐃᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒻᒪᕆᖕᓄᑦ (IPHTG). ᑖᒃᑯᐊ ᐃᓄᐃᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒻᒪᕆᑦ ᐃᓚᖃᖅᑐᑦ ᑭᒡᒐᖅᑐᐃᔨᐅᔪᓂ ᑎᓴᒪᓂ ᐃᓄᐃᑦ ᓄᓇᖏᑕ ᐊᕕᒃᑐᖅᓯᒪᓂᖏᓐᓂ ᑖᒃᑯᐊᓗ ᑲᓇᑕᐅᑉ ᓂᒋᐊᓂ, ᐅᑭᐅᖅᑕᖅᑐᒥ ᐊᒻᒪᓗ ᒐᕙᒪᑐᖃᒃᑯᑦ ᒐᕙᒪᖏᓐᓂ.

ᐋᖅᑭᒃᑕᐅᓯᒪᓂᖏᑦ ᓇᓗᓇᐃᕆᔪᖅ ᐱᖓᓲᔪᖅᑐᓂ (6) ᐃᓂᒋᔭᐅᔪᓂ ᖃᓄᐃᓕᐅᕆᐊᕈᑕᐅᒋᐊᓕᖕᓂ ᐊᒻᒪᓗ ᑮᓇᐅᔭᖃᖅᑎᑕᐅᒋᐊᓕᖕᓂ:

1. ᐱᐅᓯᕚᓪᓕᖅᑎᑕᐅᓗᓂ ᐳᕙᓪᓗᓐᓇᖅᑐᒧᑦ ᐸᖅᑭᔭᐅᓂᕐᒧᑦ ᐊᒻᒪᓗ ᐱᑕᖃᖅᑕᐃᓕᒪᑎᑦᓯᓂᕐᒧᑦ ᐱᓕᕆᐊᖑᔪᓂ
2. ᐊᔪᖅᓴᕈᓐᓃᖅᑎᑦᑎᓗᑎ, ᐱᐅᓯᕚᓪᓕᖅᑎᑦᑎᓗᑎ ᐃᓅᓯᕐᒨᖓᔪᓂ ᖃᓄᐃᓕᖓᕈᑕᐅᔪᓂ ᖃᓄᐃᙱᑦᑎᐊᕐᓂᕐᒧᑦ ᐊᒻᒪᓗ ᓴᖅᑮᓗᑎ ᐃᓅᓯᕐᒥ ᐊᒥᒐᙱᓐᓂᐅᔪᓂ
3. ᓴᙱᓂᖅᑖᖅᑎᑦᑎᓂᕐᒥ ᐊᒻᒪᓗ ᐊᐅᓚᔾᔭᐃᓂᕐᒥ ᓄᓇᓕᖕᓂ
4. ᓴᙱᓂᖅᓴᐅᓕᖅᑎᑕᐅᓂᖓ ᐳᕙᓪᓗᓐᓇᖅᑐᒧᑦ ᐸᖅᑭᔭᐅᓂᕐᒧᑦ ᐊᒻᒪᓗ ᐱᑕᖃᖅᑕᐃᓕᒪᑎᑦᓯᓂᕐᒧᑦ ᐃᓗᓕᖃᕈᓐᓇᕐᓂᖓᓄᑦ
5. ᐋᖅᑭᒃᓱᐃᓂᕐᒥ ᐊᒻᒪᓗ ᐊᑐᓕᖅᑎᑦᑎᓂᕐᒥ ᐃᓄᖕᓄᑦ ᑐᕌᖓᔪᓂ ᐋᖅᑭᒋᐊᕈᑎᒃᓴᓂ
6. ᖃᐅᔨᒪᒋᐊᑦᑎᐊᓂᕐᒥ ᓵᑕᐅᓕᕈᓐᓇᕐᓂᕐᓂ ᐳᕙᓪᓗᓐᓇᖅᑐᒥ ᐱᑕᖃᕈᓐᓃᖅᑎᑦᑎᓂᕐᒧᑦ

ᑖᒃᑯᐊ ᓯᕗᓪᓕᐅᔾᔭᐅᔭᕆᐊᓖᑦ ᖃᓄᐃᓕᐅᕆᐊᕐᓂᕐᒧᑦ ᐊᑐᖅᑕᐅᓂᐊᖅᑐᑦ ᑎᓴᒪᓄᑦ ᐃᓄᐃᑦ ᓄᓇᖏᑕ ᐊᕕᒃᑐᖅᓯᒪᓂᖏᓐᓂ ᐋᖅᑭᐅᒪᑎᑦᑎᓂᕐᒧᑦ ᐊᒻᒪᓗ ᐊᑐᓕᖅᑎᑦᑎᓂᕐᒧᑦ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᖃᓄᐃᓕᐅᕆᐊᕐᓂᕐᒧᑦ ᐸᕐᓇᐅᑎᓂ ᐋᖅᑭᒃᓱᖅᓯᒪᔪᓂ ᑐᕌᖓᓪᓗᑎ ᐊᑐᓂ ᐊᕕᒃᑐᖅᓯᒪᔫᑉ ᓯᕗᓪᓕᐅᔾᔭᐅᔭᕆᐊᓕᖏᓐᓂ, ᐱᔭᕆᐊᓕᖏᓐᓂ ᐊᒻᒪᓗ ᓴᙱᓂᕆᔭᖏᓐᓄᑦ. ᑖᔅᓱᒥᖓ ᐱᓕᕆᔾᔪᓯᕐᒥ ᐊᑐᕐᓗᓂ ᐱᓕᕆᐊᖃᕐᓂᖏᑦ ᐊᒻᒪᓗ ᖃᓄᐃᓕᐅᕆᐊᕐᓂᖏᑦ ᑕᐅᑲᙶᕐᓗᑎ ᓄᓇᓕᖕᓂ ᐳᕙᓪᓗᓐᓇᖅᑐᒧᑦ ᐋᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔾᔪᓯᐅᔪᓄᑦ.

ᐊᕕᒃᑐᖅᓯᒪᔪᓂ ᐳᕙᓪᓗᓐᓇᖅᑐᖃᕈᓐᓃᖅᑎᑦᑎᓂᕐᒧᑦ ᖃᓄᐃᓕᐅᕆᐊᕐᓂᕐᒧᑦ ᐸᕐᓇᐅᑏᑦ ᓂᕆᐅᒋᔭᐅᔪᑦ ᓴᖅᑭᑕᐅᓛᕐᓂᖏᓐᓂ ᒫᔾᔨ 2019-ᒥ.