ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ: ᑕᑯᔭᐅᔪᒪᔪᑦ ᓄᓇᖅᑲᖅᑳᖅᓯᒪᔪᓄᑦ-ᐊᑕᔪᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ: ᐊᐅᓚᑦᓯᔨᓂᑦ ᓇᐃᓈᖅᓯᒪᔪᖅ
ᑐᓴᖅᑕᑦᑎᓐᓂᑦ ᑕᒪᑐᒪᖓᑦ ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᖅ ᒪᓕᒐᒃᓴᒧᑦ ᑲᑎᒪᐅᑎᓂᑦ
ᑕᒪᒃᑭᖅᓯᒪᔪᖅ ᐅᓂᒃᑳᖅ
ᐅᓇ ᑕᒪᒃᑭᖅᓯᒪᔪᖅ, ᑐᓴᖅᑕᑦᑎᓐᓂᑦ: ᑕᑯᔭᐅᔪᒪᔪᑦ ᓄᓇᖅᑲᖅᑳᖅᓯᒪᔪᓄᑦ - ᐊᑕᔪᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ, ᐊᑐᐃᓐᓇᐅᔪᖅ ᐅᐃᕖᖅᑎᑐᑦ ᐊᒻᒪᓗ ᖃᓪᓗᓈᑎᑐᑦ ᑐᒃᓯᕌᒍᓂ. ᑐᒃᓯᕋᕈᓐᓇᕐᒥᔪᓯ ᑕᕐᕋᖓᓂ ᐊᐅᓚᑦᓯᔨᓂᑦ ᓇᐃᓈᖅᓯᒪᔪᑦ ᓄᓇᖅᑲᖅᑳᖅᓯᒪᔪᑦ ᐅᖃᐅᓯᖏᑦ: ᑲᓇᖕᓇᖓᓂ ᐅᔾᔨᕕᐄ, ᑯᓕᐄ, ᐃᓄᒃᑎᑐᑦ, ᒥᒃᒫᒃ, ᒥᓯ ᐊᒻᒪᓗ ᑎᓂᐄ. ᐊᑏ ᖃᕆᓴᐅᔭᒃᑯᑦ lsa-ihl@sac-isc.gc.ca ᑎᑎᕋᕐᓗᑎᑦ ᐱᑎᑕᐅᔪᒪᓗᑎᑦ ᓇᓪᓕᐊᖕᓂᒃ ᑕᕐᕋᖏᓐᓂᒃ.
ᐅᕙᓂ ᒪᒃᐱᒐᕐᒥ:
ᐱᒋᐊᕐᓂᖓ
ᐅᓇ ᐅᓂᒃᑳᖅ, ᑐᓴᖅᑕᕗᑦ: ᑕᑯᔭᐅᔪᒪᔪᑦ ᓄᓇᖅᑲᖅᑳᖅᓯᒪᔪᓄᑦ-ᐊᑕᔪᑦ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᒪᓕᒐᒃᓴᒧᑦ. ᓇᐃᓈᖅᓯᒪᔪᑦ ᐅᖃᐅᓯᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᒫᓐᓇᒧᑦ ᐱᔭᐅᓯᒪᔪᑦ ᓄᓇᖅᑲᖅᑳᖅᓯᒪᔪᓂᑦ ᐅᑯᓂᖓ ᐱᔾᔪᑎᓖᑦ:
- ᖃᓄᐃᓕᖓᓂᖓ ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᑲᓇᑕᒥ
- ᑖᒃᑯᐊᑦ ᑕᑯᔪᒪᔭᖏᑦ ᐃᓚᓕᐅᑎᓗᒋᑦ ᓄᓇᖅᑲᖅᑳᖅᓯᒪᔪᓄᑦ-ᑐᕌᖅᑐᑦ+ ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᒪᓕᒐᒃᓴᖅ ᐱᐅᓯᕚᓪᓕᕐᓂᐊᕐᒪᑕ ᐱᔪᓐᓇᕐᓗᑎᒃ ᐱᐅᓂᖅᐹᓂᒃ, ᐱᐅᓯᑐᖃᖏᓐᓄᑦ-ᐋᑐᑎᖃᖅᑐᓂᒃ, ᐊᒻᒪᓗ ᐊᑦᑕᕐᓇᖅᑐᒦᑕᐃᓕᔾᔪᑏᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐱᔨᑦᑎᕋᐅᑎᖏᓐᓂᒃ.
ᑕᐃᑲᒐᑦ ᐅᑭᐅᖅ 2021 ᑎᑭᓪᖢᒍ ᐅᑭᐊᒃᓵᖅ 2022, ᐊᕕᒃᑐᖅᓯᒪᔪᑦ ᐊᒻᒪᓗ ᑲᓇᑕᒥ ᐊᓪᓚᐃᑦ, ᐃᓄᐃᑦ, ᐊᓪᓚᐃᖓᔪᑦ, ᐊᒻᒪᓗ ᑕᒪᐃᓐᓄᑦ ᐱᓇᓱᐊᖃᑕᐅᔪᑦ ᑎᑭᐅᑎᓚᐅᖅᑐᑦ ᐊᒥᓱᑎᒍᑦ ᑲᑎᒪᕙᒡᖢᑎᒃ ᑖᒃᑯᓇᓂ ᓄᓇᒥᖕᓂ. ᑲᓇᑕᐅᑉ ᒐᕙᒪᒃᑯᖏᑦ ᐱᓯᒪᓕᖅᑕᖏᑦ ᑕᒪᕐᒥᐸᓗᒃ ᐃᓕᖁᔭᐅᔪᑦ ᐅᖃᐅᓯᖏᑦ ᓄᓇᖅᑲᖅᑳᖅᓯᒪᔪᑦ ᐱᓇᓱᐊᖃᑎᒌᖕᓂᑦ ᐊᒻᒪᓗ ᖁᕕᐊᓱᒃᐳᖓ ᑐᓂᓯᔪᓐᓇᕋᒪ ᐆᒥᖓ ᓇᐃᓈᖅᓯᒪᔪᒥᒃ ᐅᓂᒃᑳᒥᒃ.
ᐅᓇ ᐅᓂᒃᑳᖅ ᐃᑲᔪᕐᓂᐊᖅᑐᖅ ᑐᓴᐅᒪᓕᕐᓗᓯ ᐊᒡᒋᖅᑐᓂᒃ ᐅᖃᖃᑎᒌᒍᑕᐅᓂᐊᖅᑐᓂᒃ ᐊᕙᑖᓂᑦ ᑲᓇᑕᐅᑉ ᒐᕙᒪᒃᑯᖏᑦ, ᓄᓇᖅᑲᖅᑳᖅᓯᒪᔪᑦ ᐱᓇᓱᐊᖃᑎᒋᔭᕗᑦ, ᐊᒻᒪᓗ ᑲᓇᑕᒥ ᐊᕕᒃᑐᖅᓯᒪᔪᑦ ᐊᒻᒪᓗ ᑎᐅᓕᑐᐊᓕᔅ, ᑕᐃᑲᓂ ᐊᑑᑎᖃᖅᑎᓪᓗᒍ, ᓴᕿᑦᑎᓯᒪᕗᒍᑦ ᓂᕈᐊᖅᓯᒪᔪᓐᓇᖅᑕᓂᒃ ᓄᓇᖅᑲᖅᑳᖅᓯᒪᓄᑦ-ᐱᓯᒪᔪᑦ+ ᓄᓇᖅᑲᖅᑳᖅᓯᒪᔪᑦ ᐊᓐᓂᐊᖃᖅᑕᐃᓕᑎᑦᑎᓂᕐᒧᑦ ᒪᓕᒐᒃᓴᖅ.
ᐃᑲᔪᕐᓂᐊᕐᓗᒋᑦ ᑐᑭᒧᐊᒃᑎᓪᓗᒋᑦ ᐆᒃᑑᑎᒧᑦ ᑖᔅᓱᒥᖓ ᐅᓂᒃᑳᕐᒥᒃ, ᐊᖓᔪᖅᑳᑦ ᓄᓇᖅᑲᖅᑳᖅᓯᒪᔪᓄᑦ ᐱᔨᑦᑎᕋᐅᑎᑦ ᑲᓇᑕ ᓴᓇᖃᑎᖃᖅᑐᑦ ᐅᑯᓂᖓ:
- ᐃᓐᓇᑐᖃᐃᑦ ᖃᐅᔨᒪᔨᒻᒪᕇᑦ ᑲᑎᒪᔨᖏᑦ
- ᒪᒃᑯᒃᑐᑦ
- ᑭᒡᒐᖅᑐᖅᑎᑦ ᓇᒥᑐᐃᓐᓇᖅ ᓄᓇᖅᑲᖅᑳᖅᓯᒪᔪᓂᑦ+
ᑲᑐᔾᔨᓪᓗᑕ, ᓇᐃᓈᖅᓯᓯᒪᕗᒍᑦ ᑐᑭᓯᓇᖅᓯᑎᑦᑎᓪᓗᑕ ᑐᓴᓚᐅᖅᑕᑦᑎᓐᓂᑦ ᐊᔾᔨᒌᓐᖏᑦᑐᓂᑦ ᑲᑎᒪᖃᑎᖃᖅᖢᑕ, ᐊᒻᒪᓗ ᐃᓕᑦᓯᓐᓄᑦ ᑐᓂᕙᕗᑦ ᐆᒃᑑᑎ ᐅᓇ ᐅᓂᒃᑳᖅ ᐱᓇᓱᐊᖃᑎᒋᔭᑦᑎᓐᓄᑦ ᕿᒥᕐᕈᐊᕐᓂᐊᕐᒪᒍ ᐊᒻᒪᓗ ᐅᖃᐅᓯᒃᓴᒥᖕᓂᒃ ᑐᓂᓯᓗᑎᒃ.
ᑖᒃᑯᓇᖓᑦ ᑲᑎᒪᓂᕐᓂᑦ, 9 ᑐᕌᕆᔭᐅᔪᑦ ᓴᕿᓚᐅᖅᑐᑦ ᐊᑐᓂ ᑐᑭᓕᐅᕈᑎᖃᖅᖢᑎᒃ:
- ᓄᓇᖅᑲᖅᑳᖅᓯᒪᔪᑦ ᐊᔾᔨᒋᑎᑕᐅᖕᒥᓗᑎᒃ ᐊᒻᒪᓗ ᐃᒃᐱᒋᔭᐅᑦᑎᐊᕐᓗᑎᒃ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᓂᖅ ᐋᕿᑦᑎᐊᕐᓗᓂ ᐲᖅᑕᐅᓗᑎᒃ ᖃᓪᓗᓇᐃᖓᔪᑦ ᐊᑐᐊᒐᐃᑦ ᐊᒻᒪᓗ ᐅᕕᓂᖃᑎᒋᓐᖏᑕᖏᓐᓂᒃ ᐱᓕᕆᔾᔪᓯᑦ.
- ᓄᓇᖅᑲᖅᑳᖅᓯᒪᔪᑦ ᐱᓕᕆᔪᓐᓇᖅᑐᖅ ᓄᓇᖁᑎᒥᖕᓂᒃ ᐊᐅᓚᑦᑎᓗᑎᒃ ᐊᒻᒪᓗ ᐱᔪᓐᓇᐅᑎᒥᖕᓂᒃ ᐃᒻᒥᒍᑦ-ᐊᐅᓚᑦᑎᓗᑎᒃ ᐃᓱᒪᖅᓱᕐᓗᑎᒃ.
- ᑕᒪᒃᑭᖅᓯᓯᒪᔪᓂᒃ ᐱᒋᐊᕈᑎᖃᕐᓗᑎᒃ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᑐᕌᖅᑐᖅ ᓄᓇᖅᑲᖅᑳᖅᓯᒪᔪᑦ ᐱᐅᓯᖏᑦᑎᒍᑦ ᖃᐅᔨᒪᓂᖏᑦᑎᒍᑦ ᐊᒻᒪᓗ ᑕᐃᒪᐃᑑᓂᖏᑦ ᐊᒻᒪᓗ ᐃᓅᓯᖏᑦᑎᒍᑦ ᐊᑕᔪᑦ ᖃᓄᐃᖏᑦᑎᐊᕈᓯᖏᑦᑎᒍᑦ.
- ᐋᓐᓂᐊᖃᕐᓇᓐᖏᑦᑐᓕᕆᓂᖅ, ᐋᓐᓂᐊᕕᖕᒥ ᐱᓇᓱᐊᖅᑎᑦ ᖃᐅᔨᒪᔨᒻᒪᕇᑦ ᐊᒻᒪᓗ ᒐᕙᒪᒃᑯᑦ ᐱᔭᒃᓴᖃᖅᑐᑦ ᐱᓕᕆᐊᒃᓴᓄᑦ ᐊᒻᒪᓗ ᓴᖕᖏᒃᑎᒋᐊᕐᓗᒋᑦ ᓵᑕᒃᓴᐅᔭᕆᐊᖃᕐᓂᑎᒃ ᓄᓇᖅᑲᖅᑳᖅᓯᒪᔪᓄᑦ.
- ᐃᒃᐱᒋᒍᓱᑦᑎᐊᕐᓗᑎᒃ ᐃᓚᒌᒍᓯᖏᑦ ᐊᕙᑖᓂᑦ ᓄᓇᖅᑲᖅᑳᖅᓯᒪᔪᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ.
- ᐊᑑᑎᖃᖅᑐᓂᒃ, ᓈᒻᒪᒃᑐᓂᒃ, ᓄᖑᑲᐅᑎᒋᔮᓐᖏᑦᑐᓂᒃ, ᐃᓚᓕᐅᔾᔨᑦᑎᐊᖅᓯᒪᔪᓂᒃ ᐊᒻᒪᓗ ᐊᓯᕈᖅᑕᕐᕕᖃᕈᓐᓇᖅᑐᓂᒃ ᑮᓇᐅᔭᒃᓴᓂᒃ ᐊᑐᐃᓐᓇᖅᑕᖃᕐᓗᓂ ᓄᓇᖅᑲᖅᑳᖅᓯᒪᔪᓄᑦ.
- ᓄᓇᖅᑲᖅᑳᖅᓯᒪᔪᓂᑦ ᐊᐅᓚᑕᐅᓗᑎᒃ ᖃᐅᔨᓴᕈᑎᑖᑦ ᐊᒻᒪᓗ ᑐᓴᒐᒃᓴᐃᑦ ᐊᑐᐃᓐᓇᐅᔪᑦ ᐃᑲᔫᑎᓂᐊᖅᑐᑦ ᒪᒥᓴᐃᓂᕐᒧᑦ.
- ᐊᑦᑕᕐᓇᖅᑐᒦᑦᑐᑦ ᐋᓐᓂᐊᕕᓕᐊᕆᐊᓕᖕᓄᑦ ᐱᔨᑦᑎᕋᐅᑎᖏᑦ ᑎᑭᐅᑎᓯᒪᑦᑎᐊᕐᓗᑎᒃ ᑭᖕᖒᒪᒋᔭᖏᓐᓄᑦ
- ᐃᑲᔪᕐᓗᑎᒃ ᐊᒻᒪᓗ ᐋᕿᒃᓱᐃᓗᑎᒃ ᐱᓕᕆᔪᓐᓇᖅᑐᓂᒃ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐃᖅᑲᓇᐃᔭᖅᑎᒃᓴᓂᒃ.
ᐅᓇ ᐊᐅᓚᑦᓯᔨᑦ ᓇᐃᓈᖅᓯᒪᔪᖅ ᑕᑯᑎᑦᑎᓯᒪᔪᖅ ᑐᓴᖅᑕᐅᒐᔪᒃᑐᓂᒃ, ᑕᐃᒪᐃᖏᓐᓇᖅᐸᒃᑐᓂᒃ ᐊᒻᒪᓗ ᐳᐃᒍᓇᓐᖏᑦᑐᓂᒃ ᑐᓴᕐᑎᑦᑎᔾᔪᑎᑦ ᐅᑯᐊ ᑐᓴᖅᑕᐅᒋᐊᓕᑦ ᑕᒪᐃᓐᓂᑦ ᐊᔾᔨᒌᓐᖏᑦᑐᓂᒃ+. ᐱᓯᒪᓂᖃᓐᖏᓪᓗᓂ ᐊᑕᐅᓯᕐᒧᑦ ᓄᓇᖅᑲᖅᑳᖅᓯᒪᔪᑦ ᓄᓇᖏᓐᓄᑦ ᐅᕝᕙᓘᓐᓃᑦ ᐊᐅᓚᑦᓯᔨᖏᓐᓄᑦ. ᑕᒪᒃᑭᖅᓯᒪᔪᖅ ᐅᓂᒃᑳᖅ, ᐊᑐᓂ ᑐᑭᓕᐅᖅᓯᒪᔪᖅ ᑐᓂᔭᐅᓂᐊᖅᑐᖅ ᓇᓗᓇᐃᔭᑦᑎᐊᖅᓯᒪᓗᓂ ᐊᑐᖅᓯᓗᑎᒃ ᐅᖃᐅᓯᖏᓐᓂᒃ ᐊᓪᓚᐃᑦ, ᐃᓄᐃᑦ, ᐊᓪᓚᐃᖓᔪᑦ, ᐊᒻᒪᓗ ᑭᑭᑕᐅᖃᑦᑕᖅᓯᒪᔪᑦ ᑭᒃᑯᑐᐃᓐᓇᐃᑦ.
ᐅᖃᖅᑕᐅᔪᑦ ᐃᓐᓇᑐᖃᐃᑦ ᖃᐅᔨᒪᔨᒻᒪᕆᑦ ᑲᑎᒪᔨᖏᓐᓂᑦ
"ᐃᖏᕐᕋᓂᖅ ᐃᓄᑦᑎᐊᕐᓂᕐᒧᑦ ᑲᔪᓯᔪᖅ ᐊᒻᒪ ᐊᒃᓱᕈᕐᓇᖅᑐᖅ ᑭᓯᐊᓂ ᐊᔪᕐᓇᙱᑦᑐᖅ ᓴᖅᑭᕙᓪᓕᐊᔪᑦ ᐊᒥᓱᑦ ᐊᔾᔨᒌᙱᑦᑐᒃᑯᑦ. ᐆᑦᑑᑎᒋᓗᒍ ᐊᓪᓚᐃᑦ ᓵᔅ, ᐊᑐᐊᒐᖅ ᐊᒻᒪ ᒪᓕᒐᐃᑦ ᐃᓚᒋᔭᐅᔪᑦ ᐊᑭᑐᔫᑎᑦ ᐋᖅᑭᒃᓱᖅᑕᐅᓯᒪᔪᑦ ᐊᒻᒪ ᐆᑦᑐᕋᐅᑦ ᐱᒻᒪᕆᐅᔪᑦ ᓄᓇᓕᓐᓄᑦ ᐊᒻᒪ ᐅᓂᒃᑳᓗᒋᑦ ᑭᖑᕚᑦᑎᓐᓂᑦ, ᐃᓕᖅᑯᓯᕗᑦ ᐊᒻᒪ ᐱᖅᑯᓯᕗᑦ, ᐊᒻᒪ ᓴᖅᑭᕙᓪᓕᐊᔪᑦ ᐃᓅᑦᑎᐊᕐᓂᕐᒧᑦ ᓄᓇᖃᖅᑳᖅᓯᒪᔪᑎᒍᑦ, ᐃᓄᐃᑦ, ᐊᒻᒪ ᐊᓪᓚᐃᑦ ᐃᓱᒪᒋᔭᖏᑎᒍᑦ ᐊᒻᒪ ᑕᐅᑦᑐᒋᔭᖏᑦ."
"ᐅᑉᐱᕈᓱᒃᑐᖓ ᓯᕗᕚᕗᑦ ᕿᒪᐃᓯᒪᔪᑦ ᖃᐅᔨᒪᓂᖅ ᐊᒻᒪ ᓴᓇᕐᕈᑎᑦ ᐊᓂᒍᖅᑎᓪᓗᒍ ᐊᕐᕕᐊᕐᓇᖅᑐᑦ. ᒫᓐᓇ ᑎᑭᓯᒪᓕᖅᑐᒍᑦ ᑕᒫᓂ ᐊᒻᒪ ᐃᑉᐱᒋᑦᑎᐊᕐᓂᒃᑯᑦ ᐊᑐᖅᑕᕗᑦ ᖃᐅᔨᒪᓂᖏᑦ ᐊᒻᒪ ᑎᒍᓗᒋᑦ ᓴᓇᕐᕈᑎᑦ ᕿᒪᐃᓯᒪᔭᖏᑦ ᐅᕙᑦᑎᓐᓄᑦ ᓯᕗᒧᐊᖅᑎᓪᓗᑕ ᐅᑎᖅᑎᓐᓂᐊᕐᓗᒋᑦ ᐅᑎᖅᑎᒍᓐᓇᙱᑕᕗᑦ ᐊᒻᒪ ᐱᒋᓗᒋᑦ ᐱᔪᓐᓇᐅᑎᕗᑦ ᖃᓄᐃᙱᑦᑎᐊᕐᓂᕐᒧᑦ ᐊᒻᒪ ᓴᙱᓂᖅ ᐃᓅᓯᒧᑦ."
"ᕿᓐᓅᖅᑐᖓ ᓴᖅᑭᑎᑦᑎᓗᑕ ᐊᖅᑯᑎᒥᒃ ᐊᑲᐅᓈᖅᑐᖅ ᑭᒃᑯᓕᒫᓄᑦ ᐊᒻᒪ ᐃᓄᓗᒃᑖᓄᑦ ᑐᕌᕐᓗᒍ ᐃᓅᑦᑎᐊᕐᓂᕐᒧᑦ ᐊᒻᒪ ᓴᐃᒪᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐊᓯᓄᑦ ᐃᓄᓐᓄᑦ ᑕᒫᓂ ᓄᓇᒥ ᐊᑎᖃᖅᑐᖅ ᐊᓈᓇ ᓯᓚᕐᔪᐊᖅ ᓴᓇᔨ ᑐᓂᓯᔪᖅ ᐅᕙᑦᑎᓐᓄᑦ."
ᑎᑎᕋᐅᔭᖅᓯᒪᔪᑎᒍᑦ ᑐᑭᓯᑎᑦᑎᓂᖅ
[ᑎᑎᖃᖏᑦ ᓇᓗᓇᐃᔭᖅᓯᒪᔪᑦ ᑎᑎᕋᐅᔭᖅᓯᒪᓪᓗᑎᒃ ᓇᐃᓈᖅᓯᒪᔪᑦ:
ᐅᓇ ᑎᑎᕋᐅᔭᖅᓯᒪᔪᖅ ᑐᑭᓯᓇᖅᓯᑎᑦᑎᓯᒪᔪᖅ ᓇᐃᓈᖅᓯᒪᓪᓗᓂ ᑐᓴᖅᑕᖏᑦ ᑲᓇᑕᐅᑉ ᒐᕙᒪᒃᑯᖏᑕ ᑖᒃᑯᓇᖓᑦ ᐊᓪᓚᐃᑦ, ᐃᓄᐃᑦ, ᐊᓪᓚᐃᖓᔪᑦ, ᐊᒻᒪᓗ ᑭᑭᑕᐅᕙᒃᑐᑦ ᑭᒃᑯᑐᐃᓐᓇᐃᑦ ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᒪᓕᒐᒃᓴᖏᓐᓄᑦ.
ᖁᓕᓕᒫᖓ ᑎᑎᕋᐅᔭᖅᓯᒪᔪᖅ ᐃᒪᓐᓇᐃᓕᖓᕗᖅ, ᐊᔾᔨᒌᓐᖏᑦᑐᑦ ᓄᓇᐃᑦ ᓴᕿᓯᔮᖅᐳᑦ. ᓴᐅᒥᐊᓂ ᖃᖃᐃᑦ ᑐᓄᐊᓃᓪᖢᑎᒃ, ᐱᑕᖃᕐᒥᔪᖅ ᓄᓇᓕᖅᐸᐅᔭᐃᑦ ᐃᒡᓗᖏᑦ ᐊᒻᒪᓗ ᓄᓇᓕᖅᐸᐅᔭᕐᒥ ᐳᖅᑐᔫᑎᑦ ᐃᒡᓗᐃᑦ. ᖁᓛᓂ ᕿᑎᐊ ᒪᓂᕋᖅ ᓄᓇᖓ, ᑐᐱᖅ ᐊᒻᒪᓗ ᐊᓪᓚᐃᖓᔪᑦ ᑲᓕᖓ ᑲᓕᑕᐅᓪᓗᓂ ᕿᒻᒥᕐᔪᐊᕐᒥᑦ ᓄᓇᓕᐸᐅᔭᕐᒧᖓᐅᔪᑦ ᐅᖓᓯᒋᔭᒥᖕᓄᑦ. ᑕᓕᕐᐱᐊᓂ, ᐅᑭᐅᖅᑕᖅᑐᖅ ᓄᓇᖓ ᓴᕿᔮᖅᑐᖅ ᐊᐳᑎᖃᖅᖢᓂ ᐊᒻᒪᓗ ᖃᒧᑕᐅᔭᖅ ᑲᓕᑦᑐᖅ ᖃᒧᑎᒥᒃ, ᑕᑭᓪᓗᓂ ᖃᒧᑎᖓ.
ᑖᓐᓇ ᐊᑦᑎᖅᓯᒪᓪᓗᓂ "ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ" ᑖᒃᑯᐊ ᖁᓛᓃᑦᑐᑦ ᐊᑖᓂ ᑎᑎᕋᖅᓯᒪᔪᖅ.
ᓴᕿᑦᑐᑦ ᐊᔾᔨᒌᓐᖏᑦᑐᑦ ᓄᓇᐃᑦ, ᓇᑭᑐᐃᓐᓇᖅ ᑰᒐᓛᑦ ᐃᒥᖅ ᑕᒪᔾᔭᐅᕗᖅ ᐊᑕᐅᓯᕐᒧᐊᖓᓪᖢᓂ ᑰᖕᒧᑦ ᐅᓇᓗ ᑕᑭᒡᓕᕙᓪᓕᐊᔪᖅ ᓯᓕᒃᓯᕙᓪᓕᐊᓗᓂᓗ ᑕᒪᓐᓇᓗ ᐊᓄᕆᑦ ᑎᑎᖃᐅᓪᓗᓂ. ᕿᓂᖅᑐᒥᒃ ᐊᒥᐊᓕᑦ ᑕᓪᓕᒪᑦ ᐃᓄᐃᑦ, ᑕᑭᓕᕇᑦ ᐊᒻᒪᓗ ᓯᓕᓕᕇᑦ, ᐱᓱᒃᑐᑦ ᓴᓂᐊᒍᑦ ᑰᒃ, ᑕᐃᑲᓂ ᑎᑎᖃᖅᑕᖃᖅᖢᓂ ᐅᖃᐅᖅᓯᒪᔪᑦ "ᓱᓇᑐᐃᓐᓇᐃᑦ ᐱᓕᕆᐊᖑᓂᐊᖅᑐᑦ ᐊᔾᔨᒋᓐᖏᑕᖓᓂᒃ", ᐅᓇ ᓄᑖᖅ ᐅᓪᓗᖅ: ᐊᑐᖅᑕᕗᑦ ᐱᓕᕆᐊᖑᖁᔭᐅᔪᑦ ᐊᒻᒪᓗ ᒪᓕᑦᑎᐊᕆᐊᓕᑦ", ᐊᒻᒪᓗ "ᓄᓇᖅᑲᖅᑳᖅᓯᒪᔪᑦ ᐱᑕᖃᕆᐊᖃᒻᒪᒃᑐᑦ ᓯᕗᓂᒃᓴᖓᓂ ᑲᓇᑕ" ᑎᑎᕋᖅᓯᒪᓪᓗᑎᒃ.
ᓴᐅᒥᐊᓂ ᓴᖑᓯᒪᓂᖓᓂ ᑰᒃ, ᑕᐃᒎᓯᑦ "ᐊᔾᔨᒌᒃᑎᑦᑎᓂᖅ ᐊᒻᒪᓗ ᐃᒃᐱᒍᓱᑦᑎᐊᕐᓂᖅ" ᐊᒻᒪᓗ "ᐃᒃᐱᒍᓱᑦᑎᐊᕐᓂᖅ ᓄᓇᖅᑲᖅᑳᖅᓯᒪᔪᑦ ᐊᒻᒪᓗ ᒐᕙᒪᑐᖃᒃᑯᑦ ᐃᓚᒌᒍᓯᖏᓐᓂᒃ" ᐊᒻᒪᓗ "ᐊᖏᕈᑎᑦ" ᑎᑎᕋᖅᓯᒪᓪᓗᑎᒃ
ᑕᓕᕐᐱᐊᓂ ᐊᓄᕆᖑᐊᖑᓪᓗᑎᒃ, ᑕᐃᒎᓯᑦ "ᐃᓱᒪᖅᓱᕐᓗᓯ ᐊᑐᕐᓗᒋᑦ ᓄᓇᖁᑎᓯ ᐊᒻᒪᓗ ᐱᔪᓐᓇᐅᑎᖃᖅᐳᓯ ᓇᖕᒥᓂ-ᐊᐅᓚᑦᑎᔪᓐᓇᖅᖢᓯ" ᑎᑎᕋᖅᓯᒪᓪᓗᑎᒃ.
ᐊᒻᒪᓗᑦᑕᐅᖅ, ᑕᒡᕙᓂ ᑕᓕᕐᐱᐊᓄᑦ ᓴᖑᖓᔪᖅ ᑰᒃ, ᐱᖓᓱᑦ ᐊᖕᒪᓗᖅᑐᑦ ᐊᔾᔨᖑᐊᖃᖅᑐᑦ ᐃᓗᐊᓂ. ᓯᕗᓪᓕᖅ ᐊᔾᔨᖑᐊᖅ ᐋᓐᓂᐊᕕᒃ ᑎᑎᖃᖃᖅᖢᓂ "ᐋᓐᓂᐊᕕᓕᕆᓂᖅ". ᐱᖃᑖᓂ ᐊᒥᓱᑦ ᐃᓄᐃᑦ ᑎᑎᖃᑦ ᐊᕙᓗᐊᓂ "ᐋᓐᓂᐊᖃᖅᑕᐃᓕᑎᑦᑎᓂᕐᒥ ᖃᐅᔨᒪᔪᕐᔪᐊᑦ". ᐅᓇ ᐱᖓᔪᐊ ᒪᓕᒐᓕᐅᕐᕕᒃᔪᐊᒥ ᐋᑐᕚᒥ ᐊᕙᓗᐊ ᑎᑎᕋᖃᖅᑐᖅ "ᑲᓇᑕᐅᑉ ᒐᕙᒪᒃᑯᖏᑦ". ᖁᓛᓂ ᑎᑎᕋᐅᔭᖅᓯᒪᔪᖅ, ᑕᐃᒎᓯᑦ "ᐱᓕᕆᔭᕆᐊᖃᖅᑕᑦ ᐱᓕᕆᐊᕆᓗᒋᑦ ᐊᒻᒪᓗ ᓴᖕᖏᒃᑎᒋᐊᕐᓗᒍ ᓵᑕᒃᓴᐅᓂᖅ" ᑎᑎᕋᖅᓯᒪᕗᑦ. ᑕᒪᔾᔭᑦᑕᐅᖅ ᑎᑎᕋᐅᔭᖅᓯᒪᔪᑦ ᑎᑎᖅᑐᖅᓯᒪᔪᑦ ᐊᑎᖃᖅᖢᓂ "ᓵᑕᒃᓴᐅᓂᐊᕐᓗᓂ ᐊᑐᕆᐊᓕᑦ".
ᑕᒪᓐᓇ ᓴᖑᖓᔪᖅ ᑰᒃ ᓯᓕᒃᓯᒋᐊᖅᖢᓂ ᐊᒻᒪᓗ ᑕᑕᓯᒪᕗᖅ ᑎᑎᕋᐅᔭᖅᓯᒪᔪᓂᒃ. ᓴᓂᐊᓂ ᑕᓕᕐᐱᐊᓂ ᑖᔅᓱᒪᓕᒫᖅ ᑎᑎᕋᕐᕕᒃᓴᖅ ᑭᓇᒃᑯᖑᐊᑦ 7-ᖑᓪᓗᑎᒃ ᑮᓇᐃᑦ ᓴᕿᔮᖅᑐᑦ, ᐅᑭᐅᖃᑎᒌᓐᖏᑦᑐᑦ ᐊᒻᒪᓗ ᐊᖑᑎᑦ ᐊᕐᓇᐃᓪᓗ. ᐊᑕᐅᓯᖅ ᐃᓄᒃ ᐊᑐᖅᑐᖅ ᐅᕕᓂᕈᕐᒥᑦ ᑐᓄᐊᓂ ᓴᐃᒻᒪᑎᖑᐊᖅ ᐊᖑᑕᐅᖃᑎᒌᑦ ᐊᕐᓇᐅᖃᑎᒌᖕᓄᑦ ᑐᕌᖅᑐᖅ. ᑎᑭᐅᒪᔪᑦ ᓴᐅᒥᐊᓄᑦ ᑖᒃᑯᐊ ᑭᓇᒃᑯᖑᐊᑦ ᐊᒻᒪᓗ ᑎᑭᐅᑎᓯᒪᓪᓗᑎᒃ ᓴᖒᖅᓯᒪᔪᒧᑦ ᑰᖕᒧᑦ ᑎᑎᕋᐅᔭᖅᓯᒪᓪᓗᑎᒃ ᑕᖅᓯᖅᓱᖅᓯᒪᑦᑎᐊᖅᖢᑎᒃ, ᑎᑎᑯᑖᒃᓯᒪᔪᑦ ᓴᕿᑦᑎᓯᒪᓪᓗᑎᒃ ᐊᔾᔨᒌᓐᖏᑦᑐᓂᒃ ᑕᖏᕐᓂᒃ.
ᑕᒪᓐᓇ ᑐᖑᔪᕐᓂᖓ, ᐊᑎᖓ, ᑕᐃᒎᓯᑦ "ᐱᒻᒪᕆᐅᓗᐊᖅᑐᑦ ᐋᓐᓂᐊᕕᓕᕆᓂᕐᒥ ᑭᖕᖒᒪᓇᖅᑐᑦ" ᑎᑎᕋᖅᓯᒪᓪᓗᓂ ᑖᒃᑯᓇᓂ ᐊᒥᓱᓂ ᑎᑎᖃᓂᑦᑕᐅᖅ, ᐅᑯᐊ ᐃᓚᒋᔭᐅᓪᓗᑎᒃ:
- ᓄᓇᓕᖅᐸᐅᔭᓂ ᐱᔨᑦᑎᕋᖅᑕᐅᓂᖅ
- ᐊᑯᓂᐅᔪᒃᑯᑦ ᐸᕿᔭᐅᓂᖅ
- ᐃᑭᐊᕿᕕᖕᓄᑦ ᐊᑦᑕᑎᑦ, ᖃᕆᓴᐅᔭᒃᑯᑦ ᐃᓅᓕᓴᐅᓯᕆᓂᖅ, ᖃᕆᓴᐅᔭᒃᑯᑦ ᓴᕿᔮᕐᓂᖅ
- ᐃᕐᓂᓱᒃᓰᓂᖅ, ᓯᖓᐃᓂᖅ, ᓱᕈᓯᓕᕆᓂᖅ ᐊᒻᒪᓗ ᓱᕈᓰᑦ ᖃᓄᐃᖏᑦᑎᐊᕆᐊᖃᕐᓂᖏᑦ
- ᐃᓄᑭᑦᑐᓄᑦ ᐊᒻᒪᓗ ᓄᓇᓕᕋᓛᓄᑦ ᐱᔨᑦᑎᕋᐅᑎᑦ
- ᐊᑭᑐᔪᑦ ᐊᒻᒪᓗ ᐱᖁᑎᕐᔪᐊᑦ ᓇᑉᐸᕆᐊᓕᑦ
- ᐊᐃᑉᐸᕇᖕᓂᕐᒧᑦ ᐋᓐᓂᐊᖃᕐᓇᓐᖏᑦᑐᓕᕆᓂᖅ ᐱᔨᑦᑎᕋᐅᑎᑦ
- ᐊᖑᑎᓄᑦ ᐊᕐᓇᓄᑦ- ᐊᑐᓂ ᐱᔨᑦᑎᕋᐅᑎᑦ
- ᐃᓱᒪᓕᕆᓂᖅ ᐊᒻᒪᓗ ᒪᒥᓴᕐᓂᖅ
- ᐋᓐᓂᐊᕕᓕᐊᕈᓐᓇᐅᑎᑦ ᐃᑲᔫᓯᐊᑦ ᓇᓪᓕᐅᒃᑯᒫᑦ
- ᐃᓄᒃᑎᑑᓕᕆᔨᑦ ᑐᓵᔨᑦ ᐊᒻᒪᓗ ᐅᖃᐅᓯᓕᕆᓂᕐᒧᑦ ᐱᔨᑦᑎᕋᖅᑎᑦ
- ᐃᑲᔪᖅᑎᐅᖃᑕᐅᔪᑦ
ᑕᒪᓐᓇ ᐳᐳᓪ ᑕᖅᓴᓕᒃ, ᑕᓕᖅᐱᐊᓃᑦᑐᖅ ᖁᓕᖅᐸᓯᖓᓂ ᐃᓚᖃᖅᑐᖅ ᓈᓴᐅᓯᕆᔪᓂᒃ, ᓇᓗᓇᐃᒃᑯᓯᖅᓲᑎᑦ ᐊᒻᒪᓗ ᐅᓂᒃᑳᖅᑎᑦ. ᐅᑯᐊ ᑕᐃᒎᓯᑦ "ᐅᓂᒃᑳᖅ" ᐊᒻᒪᓗ "ᐅᖃᓪᓚᒃᑐᖅ" ᓴᕿᔮᖅᖢᑎᒃ ᖁᓕᖏᓐᓂ ᐃᓄᖑᐊᑦ. ᖁᓛᓂ ᑕᐃᒎᓯᑦ "ᓄᓇᖅᑲᖅᑳᖅᓯᒪᔪᑦ ᐊᐅᓚᑦᑎᓗᑎᒃ ᓇᖕᒥᓂᖅ ᖃᐅᔨᓴᖅᓯᒪᔪᓂᒃ ᐊᒻᒪᓗ ᖃᐅᔨᒪᔾᔪᑎᒃᓴᓂᒃ ᐊᑐᐃᓐᓇᐅᓗᑎᒃ" ᑎᑎᕋᖅᓯᒪᓪᓗᑎᒃ.
ᖁᖅᓱᖅᑕᒥ ᐋᕿᑦᑎᐊᖅᓯᒪᖕᒥᔪᖅᑕᐅᖅ ᐊᑖᓂ ᐳᐳᓪ ᑕᖅᓴᓕᖕᒥ, ᐅᑯᐊ ᑕᐃᒎᓯᑦ "ᐋᓐᓂᐊᕕᖕᓂ ᐃᖅᑲᓇᐃᔮᖃᕐᓂᖅ" ᑎᑎᕋᖅᓯᒪᓪᓗᑎᒃ. ᑕᐃᒪᓐᓇ ᐋᕿᑦᑎᐊᖅᓯᒪᔪᓂ, ᒪᕐᕉᒃ ᑎᑎᕋᐅᔭᖅᓯᒪᔪᑦ, ᐊᑕᐅᓯᖅ ᐋᓐᓂᐊᕕᖕᒥ ᖃᐅᔨᒪᔪᕐᔪᐊᖅ ᐱᓕᕆᔨᒻᒪᕆᖓᑦ ᐊᑐᖅᑐᖅ ᑎᒡᓕᕐᓂᖅᓯᐅᕈᑎ ᓱᕈᓯᕐᒧᑦ ᐅᓇᓗ ᑎᒍᒥᐊᖅᑕᐅᔪᖅ ᐊᓈᓇᒥᓂᑦ ᐊᑖᑕᒥᓂᓪᓘᓐᓃᑦ. ᐊᓯᖏᑦ ᑎᑎᕋᐅᔭᖅᓯᒪᔪᑦ ᓴᕿᔮᖅᑐᑦ ᐋᓐᓂᐊᕕᖕᒥ ᐱᓇᓱᐊᖅᑎᒻᒪᕆᒃ ᐃᓗᐊᖅᓴᐃᔪᖅ ᐃᓐᓇᖓᔪᒥᒃ ᐋᓐᓂᐊᔪᒥᒃ.
ᐊᓯᐊᒍᑦᑕᐅᖅ ᑐᖑᔪᖅᑐᖅ ᐊᑖᓂ ᓴᐅᒥᐊᓂ ᑎᑎᕋᖅᓯᒪᔪᑦ, ᑕᐃᒎᓯᑦ "ᐊᖕᑐᑎᖃᑦᑎᐊᖅᑐᓂᒃ ᓈᒻᒪᒃᑐᓂᒃ, ᓄᖑᑲᐅᑎᒋᔮᓐᖏᑦᑐᓂᒃ ᐊᒻᒪᓗ ᐊᓯᕈᖅᑕᕐᕕᓕᑦ ᑮᓇᐅᔭᒃᓴᖅ ᐊᑐᐃᓐᓇᐅᓗᓂ ᓄᓇᖅᑲᖅᑳᖅᓯᒪᔪᓄᑦ" ᑎᑎᕋᖅᓯᒪᓪᓗᑎᒃ, ᐊᕙᓗᔭᐅᓯᒪᓪᓗᑎᒃ ᐸᐃᑉᐹᑦ ᑮᓇᐅᔭᑦ.
ᕿᑎᐊᓂ ᓴᕿᔮᖅᑐᑦ, ᐊᕙᓗᐊᓃᑦᑐᓪᓗ ᑕᒪᕐᒥᒃ ᐊᓯᖏᑦ ᐋᕿᒃᓱᖅᓯᒪᑦᑎᐊᖅᖢᑎᒃ, ᓄᐊᓯᒪᔭᑎᒃ ᐊᔾᔨᖏᑦ ᑕᒡᕙᓂ ᐅᖃᐅᓯᐅᔪᓂᒃ, ᓱᓗ, ᐅᓗ, ᐊᒻᒪᓗ ᑎᕆᒃᓯᐅᑦ. ᓴᐅᒥᐊᓂ ᐊᐅᐸᕐᓂᖓᑕ ᑕᒡᕙᓂᑦᑕᐃᓐᓇᖅ, ᐊᕙᓗᐊ ᑕᐃᒎᓯᖅᑕᓕᒃ "ᐃᓅᓯᓕᕆᓂᕐᒥ ᐋᓪᓕᐊᖃᕐᓇᓐᖏᑦᑐᓕᕆᓂᖅ", ᐅᑯᐊ ᓄᐊᓯᒪᔪᑦ ᐊᑕᐅᓯᕐᒥ ᐊᔾᔨᖑᐊᑦ ᐃᓚᖃᖅᑐᑦ ᖁᖅᓱᖅᑐᖅ ᓴᓇᔩᑦ ᓇᓴᖓ, ᐅᔭᕋᑦᑎᐊᖅ, ᐋᐳᐃᑦ, ᐅᑲᓕᐅᑉ ᓂᕿᖏᑦ, ᐃᒡᓗ, ᐃᑯᐊᓚᔪᖅ ᐊᒻᒪᓗ ᑮᓇᐅᔭᐃᑦ. ᑕᒫᓂ ᑕᓕᕐᐱᐊᓂ ᑕᒡᕙᓂᑦᑕᐃᓇᖅ ᑎᑎᕋᐅᔭᖅᓯᒪᔪᓂ, ᐊᕙᓗᓯᒪᔪᖅ ᑕᐃᒎᓯᕐᓂᒃ "ᓄᓇᖅᑲᖅᑳᖅᓯᒪᔪᑦ ᖃᐅᔨᒪᔾᔪᓯᖏᑦ ᐊᒻᒪᓗ ᑕᐃᒪᐃᑦᑑᓂᖓᑦ", ᐅᑯᐊ ᓄᐊᓯᒪᔪᑦ ᐊᔾᔨᖑᐊᑦ ᐃᓚᖃᖅᑐᖅ ᑎᐱᑦᑎᐊᕆᒃᑐᖅ ᐃᕕᒃᓱᒐᖅ, ᐳᔫᖅᑎᑕᕆᐊᓕᒃ ᐃᕕᒃᓱᒐᖅ, ᕿᐱᒃ ᐊᓪᓚᐃᖓᔪᑦ ᑕᖅᓴᖓᓂᒃ ᑕᖅᓴᖃᖅᑐᖅ, ᐊᒻᒪᓗ ᕿᓂᖅᑕᒥᒃ ᐊᒥᐊᖅᓯᒪᔪᑦ ᐃᓄᐃᑦ ᑕᓯᐅᖅᑐᑦ ᓵᖓᓂ ᖃᖃᐃᑦ ᑐᓄᐊᓃᖢᑎᒃ.
ᐊᑖᓂ ᑕᓕᕐᐱᐊ ᓴᕿᔮᖅᑐᖅ ᐊᐅᐸᔮᖅᑐᒥ ᑕᐃᒎᓯᑦ "ᑭᒡᓕᓯᓐᓂᐊᖅᑎᑦ", "ᐊᓯᐅᓯᒪᔪᑦ ᐃᓄᐊᖅᑕᐅᓯᒪᔪᑦ ᓄᓇᖅᑲᖅᑳᖅᓯᒪᔪᑦ ᐊᕐᓇᐃᑦ ᐊᒻᒪᓗ ᓂᕆᐋᖅᓴᐃᑦ" ᐊᒻᒪᓗ ᔪᓇᐃᑎᑦ ᓇᐃᓴᓐᔅ ᐊᖏᖅᓯᔾᔪᑎᑦ ᓱᓕᓂᕋᐅᑎᑦ ᐱᔪᓐᓇᐅᑎᖃᕐᓂᖏᓐᓄᑦ ᓄᓇᖅᑲᖅᑳᖅᓯᒪᔪᑦ" ᑎᑎᕋᖅᓯᒪᔪᑦ ᐃᓗᐊᓂ.]
ᑭᐅᔭᐅᓂᖅ ᑐᑭᖏᑦᑎᒍᑦ
1. ᓄᓇᖅᑲᖅᑳᖅᓯᒪᔪᑦ ᐊᔾᔨᒋᑎᑕᐅᖕᒥᓗᑎᒃ ᐊᒻᒪᓗ ᐃᒃᐱᒋᔭᐅᑦᑎᐊᕐᓗᑎᒃ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᓂᖅ ᐋᕿᑦᑎᐊᕐᓗᓂ ᐲᖅᑕᐅᓗᑎᒃ ᖃᓪᓗᓇᐃᖓᔪᑦ ᐊᑐᐊᒐᐃᑦ ᐊᒻᒪᓗ ᐅᕕᓂᖃᑎᒋᓐᖏᑕᖏᓐᓂᒃ ᐱᓕᕆᔾᔪᓯᑦ.
ᓄᓇᖅᑲᖅᑳᖅᓯᒪᔪᑦ ᐅᐸᒍᑎᑦᑕᐃᓕᕙᖕᒪᑕ ᐋᓐᓂᐊᕕᖕᓂ ᐱᔨᑦᑎᕋᐅᑎᖏᓐᓄᑦ ᐱᔾᔪᑎᒋᓪᓗᒋᑦ ᐅᕕᓂᖃᑎᒋᔭᐅᓐᖏᓇᒥᒃ ᐊᕿᕋᖅᑐᖅᑕᐅᖃᑦᑕᕐᒪᑕ ᐊᒻᒪᓗ ᑭᒃᑰᓂᖏᓐᓄᑦ ᑕᒪᒃᑯᐊ ᐱᓕᕆᔾᔪᓯᕆᔭᐅᒫᑲ ᐊᑐᖅᑕᐅᖃᑦᑕᖅᑐᑦ. ᑕᐃᒪᓗ ᓇᓗᓇᐃᑦᑎᐊᖅᓯᒪᕗᑦ ᐃᓚᖓ 24 ᔪᓇᐃᑎᑦ ᓇᐃᓴᓐᔅ ᓱᓕᓂᕋᐅᑎᖏᑦ ᐊᖏᖅᑕᐅᓯᒪᓂᖓᑦ ᐱᔪᓐᓇᐅᑎᖃᕐᓂᖏᓐᓄᑦ ᓄᓇᖅᑲᖅᑳᖅᓯᒪᔪᑦ, ᓄᓇᖅᑲᖅᑳᖅᓯᒪᔪᑦ ᑕᐃᒫᑦᑎᐊᖅᑕᐅᖅ ᑖᒃᑯᑎᒍᑦ ᐱᔪᓐᓇᕐᓂᖃᕐᒪᑕ ᐊᑐᕈᓐᓇᕐᒥᓗᒋᑦ ᖁᕕᐊᒋᓗᒋᑦ ᐳᖅᑐᓛᑦᑕᐅᖅ ᑎᑭᑦᑐᓐᓇᖅᑕᓄᑦ ᐱᐅᓯᑦ ᑎᒥᒧᑦ ᐊᒻᒪᓗ ᐃᓱᒪᒧᑦ ᐋᓐᓂᐊᖃᖅᑕᐃᓕᑎᑦᑎᓂᖅ.
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᐱᕕᖃᕐᑎᑦᑎᕗᖅ ᐃᒪᓐᓇ:
- ᐊᖏᕐᓗᑎᒃ ᖃᓄᖅ ᖃᓪᓗᓈᑦ ᓴᕿᑦᑎᓯᒪᔪᑦ ᓄᖃᕈᓐᓇᓐᖏᑑᔪᒥᒃ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐊᔾᔨᒋᐅᑎᑕᐅᕙᓐᖏᑦᑐᑦ
- ᐱᔪᓐᓇᐅᑎᖃᕐᒪᑕ ᓄᓇᖅᑲᖅᑳᖅᓯᒪᔪᑦ ᐱᔪᓐᓇᖅᖢᑎᒃ ᐊᑦᑕᕐᓇᖅᑐᖃᓐᖏᑦᑐᒥᒃ ᐋᓐᓂᐊᕕᖕᓂ ᐱᔨᑦᑎᕋᖅᑕᐅᓗᑎᒃ, ᐊᑭᕋᖅᑐᖅᑕᐅᓐᖏᓪᓗᑎᒃ ᐊᒻᒪᓗ ᐅᕕᓂᖃᑎᒋᓐᖏᓐᓂᒃᑯᑦ ᐊᑭᕋᖅᑐᖅᑕᐅᓐᖏᓪᓗᑎᒃ.
2. ᓄᓇᖅᑲᖅᑳᖅᓯᒪᔪᑦ ᐱᓕᕆᔪᓐᓇᖅᑐᑦ ᓄᓇᖁᑎᒥᖕᓂᒃ ᐊᐅᓚᑦᑎᓗᑎᒃ ᐊᒻᒪᓗ ᐱᔪᓐᓇᐅᑎᒥᖕᓂᒃ ᐃᒻᒥᒍᑦ-ᐊᐅᓚᑦᑎᓗᑎᒃ ᐃᓱᒪᖅᓱᕐᓗᑎᒃ.
ᓄᓇᖅᑲᖅᑳᖅᓯᒪᔪᑦ ᓄᓇᖁᑎᒥᖕᓂ ᓄᓇᖃᑎᒌᑦ. ᐃᒻᒪᑲᓪᓛᓗᖕᓂᑦ ᐱᔪᓐᓇᐅᑎᖃᖅᑐᑦ ᓇᖕᒥᓂ-ᐊᐅᓚᑦᑎᔪᓐᓇᖅᖢᑎᒃ ᐊᒻᒪᓗ ᓇᖕᒥᓂ-ᒐᕙᒪᖃᕈᓐᓇᖅᖢᑎᒃ. ᑕᒪᕐᒥᒃ ᒐᕙᒪᑦ ᐃᒃᐱᒍᓱᒋᐊᓕᑦ ᐊᒻᒪᓗ ᐃᓕᓴᖅᓯᓯᒪᓗᑎᒃ ᓄᓇᖅᑲᖅᑳᖅᓯᒪᔪᓃᒻᒪᑕ ᐊᒻᒪᓗ ᐊᖏᕈᑎᑦ ᐊᒻᒪᓗ ᐱᔪᓐᓇᕐᓂᖃᕐᕕᒋᔭᑐᖃᕆᖕᒪᔾᔪᒃ. ᓄᓇᖅᑲᖅᑳᖅᓯᒪᔪᑦ ᐱᔪᓐᓇᐅᑎᖃᕈᓐᓇᖅᑐᑦ ᓄᓇᖅᑲᖅᑳᖅᓯᒪᔪᓂᒃ-ᐊᐅᓚᑕᐅᔪᓂᒃ ᐋᓐᓂᐊᕕᖃᕐᓗᑎᒃ ᓴᓇᓯᒪᓂᖓ, ᑐᓂᓯᓯᒪᕙᖕᓂᖓ ᐊᒻᒪᓗ ᐃᓱᒪᓕᐅᕆᓂᖓ, ᐅᑯᐊᓗ ᓇᓗᓇᐃᑦᑎᐊᖅᓯᒪᔪᑦ ᐊᖏᕈᑎᑦ 3, 4, 23 ᐊᒻᒪᓗ 24 ᑖᒃᑯᓇᓂ ᔪᓇᐃᑎᑦ ᓇᐃᓴᓐᔅ ᐊᖏᕈᑎᖏᑦ ᓱᓕᓂᕋᐅᑎᖏᑦ ᐱᔪᓐᓇᐅᑎᖃᕐᓂᖏᓐᓄᑦ ᓄᓇᖅᑲᖅᑳᖅᓯᒪᔪᑦ
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᐱᕕᖃᕐᑎᑦᑎᕗᖅ ᐱᓕᕆᔪᓐᓇᕐᓂᐊᕐᒪᑕ ᓄᓇᖅᑲᖅᑳᖅᓯᒪᔪᑦ ᓇᖕᒥᓂᖅ ᐱᔪᓐᓇᕐᓂᕐᒥᒍᑦ ᓇᖕᒥᓂᖅ-ᐊᐅᓚᑦᑎᔪᓐᓇᕐᒥᒍᑦ ᐋᓐᓂᐊᕕᖕᒥ ᐱᔨᑦᑎᕋᐅᑎᓂᒃ. ᐅᓇ ᐋᕿᒍᑎᓂᐊᖅᑐᖅ ᐊᑦᑕᕐᓇᖅᑐᖃᓐᖏᓪᓗᓂ, ᓄᑖᑦ ᐱᓕᕆᔾᔪᑕᐅᓕᖅᑐᑎᒍᑦ ᐸᕿᓂᖅ ᐅᓇᓗ ᐱᐅᓯᕚᓪᓕᕐᑎᑦᑎᓂᐊᖅᑐᖅ ᐋᓐᓂᐊᖃᑦᑕᐃᓕᑎᑦᑎᓂᕐᒧᑦ ᐋᕿᒍᑎᓂᐊᖅᑐᓄᑦ.
3. ᑕᒪᒃᑭᖅᓯᓯᒪᔪᒥᒃ ᐱᒋᐊᕈᑎᖃᕐᓗᑎᒃ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᑐᕌᖅᑐᑦ ᓄᓇᖅᑲᖅᑳᖅᓯᒪᔪᑦ ᖃᐅᔨᒪᓂᖏᑦᑎᒍᑦ ᐊᒻᒪᓗ ᑕᐃᒪᐃᑑᓂᖏᓐᓄᑦ ᐊᒻᒪᓗ ᐃᓅᓯᖏᓐᓄᑦ ᐊᑕᔾᔪᓯᖏᑎᒍᑦ ᖃᓄᐃᖏᑦᑎᐊᕈᓯᖏᑦᑎᒍᑦ
ᐋᓐᓂᐊᖃᕐᓇᓐᖏᑦᑐᓕᕆᓂᖅ ᑕᒪᒃᑭᓯᓯᒪᔪᖅ. ᑎᒥᒧᑦ ᐊᒻᒪᓗ ᐃᓱᒪᒧᑦ ᐋᓐᓂᐊᓂᖅ ᐊᒃᑐᖅᑕᐅᓯᒪᕗᑦ ᐃᓅᓯᖏᑦ, ᑕᕐᓂᖏᑦ ᐊᒻᒪᓗ ᐃᓱᒪᖏᑦ, ᐊᒻᒪᓗ ᓄᓇᖏᑦ ᐊᒻᒪᓗ ᐊᕙᑎᖏᑦ ᐱᖃᓯᐅᑎᔪᑦ. ᒐᕙᒪᒃᑯᑦ ᑐᑭᓯᔭᕆᐊᖃᖅᑐᑦ ᑖᒃᑯᐊ ᓄᓇᓖᑦ ᖃᓄᐃᖏᑦᑎᐊᕈᓐᓇᖅᑐᑦ ᑕᒪᐃᕐᒥᒃ ᑕᐃᒪᓐᓇᐃᑎᑦᑎᕙᒃᑐᑦ ᐋᓐᓂᐊᓇᖅᑐᑦ ᐱᓕᕆᐊᖑᓗᑎᒃ.
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᐱᕕᖃᕐᑎᑦᑎᕗᖅ ᐃᒪᓐᓇ:
- ᐃᑲᔪᕐᓗᒋᑦ ᐋᓐᓂᐊᕕᖕᒥ ᐃᓂᖃᐅᕐᓗᑎᒃ ᓄᓇᖅᑲᖅᑳᖅᓯᒪᔪᑦ ᐃᓘᓯᓕᕆᓂᖏᑦ, ᐱᐅᓯᑐᖃᖏᑦ, ᐅᒃᐱᕆᔭᖏᑦ ᐊᒻᒪᓗ ᐊᑑᑎᖃᕆᔭᖏᑦ.
- ᐃᓕᓴᕆᓗᒋᑦ ᐱᐅᓯᑐᖃᖏᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᓇᓕᒧᑕᖏᑦ ᖃᓪᓗᓈᑦ ᐋᓐᓂᐊᕕᖏᓐᓄᑦ ᐊᒻᒪᓗ ᑕᒪᕐᒥᒃ ᐊᑐᖅᑕᐅᔪᓐᓇᖅᑐᑦ ᐱᐅᓯᕚᓪᓕᕐᓂᐊᕐᒪᑕ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐋᕿᒍᑎᔪᑦ.
- ᐃᒃᐱᒋᑦᑎᐊᕐᓗᒋᑦ ᐊᒻᒪᓗ ᐃᑲᔪᕐᓗᒋᑦ ᐃᓐᓇᑐᖃᐃᑦ ᐊᒻᒪᓗ ᖃᐅᔨᒪᔨᑦ ᐅᑯᐊ ᑲᑎᖓᑎᑦᑎᔨᒻᒪᕆᐅᖕᒪᑕ ᑭᒃᑯᑐᐃᓐᓇᕐᓂᒃ ᐊᒻᒪᓗ ᓄᓇᓕᖕᓂ ᐃᓗᐊᖅᓴᐃᔾᔪᓯᑐᖃᖏᓐᓂᒃ ᐊᒻᒪᓗ ᒪᒥᓴᐃᓂᕐᒥᒃ
4. ᐋᓐᓂᐊᖃᕐᓇᓐᖏᑦᑐᓕᕆᓂᖅ, ᐋᓐᓂᐊᕕᖕᒥ ᐱᓇᓱᐊᖅᑎᑦ ᖃᐅᔨᒪᔨᒻᒪᕇᑦ ᐊᒻᒪᓗ ᐊᒻᒪᓗ ᒐᕙᒪᒃᑯᑦ ᐱᔭᒃᓴᖃᖅᑐᑦ ᐱᓕᕆᐊᒃᓴᓄᑦ ᐊᒻᒪᓗ ᓴᖕᖏᒃᑎᒋᐊᕐᓗᒋᑦ ᓵᑕᒃᓴᐅᔭᕆᐊᖃᕐᓂᑎᒃ ᓄᓇᖅᑲᖅᑳᖅᓯᒪᔪᓄᑦ
ᐋᓐᓂᐊᖃᕐᓇᓐᖏᑦᑐᓕᕆᓂᖅ ᐱᑕᖃᓐᖏᓗᐊᕐᒪᑦ ᓵᑕᒃᓴᓂᒃ ᐊᒻᒪᓗ ᓴᕿᔮᑦᑎᐊᖅᑐᓂᒃ ᓄᓇᖅᑲᖅᑳᖅᓯᒪᔪᓄᑦ. ᑕᐃᒪᓐᓇᐅᒐᓗᐊᖅᑎᓪᓗᒍ ᐱᓂᐊᕐᓂᕋᖃᑦᑕᖅᑐᑦ ᐊᒻᒪᓗ ᐊᖏᖃᑦᑕᕋᓗᐊᖅᑐᑦ, ᓄᓇᖅᑲᖅᑳᖅᓯᒪᔪᑦ ᒥᑭᔪᒥᒃ ᐱᕙᓪᓕᐊᑎᑕᐅᖕᒪᑕ. ᑲᓇᑕᐅᑉ ᒐᕙᒪᒃᑯᖏᑦ ᒫᓐᓇᑲᐅᑎᒋ ᐱᓕᕆᔭᕆᐊᖃᓕᖅᑕᖏᑦ ᑕᒪᒃᑯᐊ ᐃᓚᐃᓐᓈᖅᑐᑦ ᐊᒻᒪᓗ ᐱᔾᔪᑕᐅᔪᑦ ᐊᒃᑐᐃᔪᑦ ᖃᓄᐃᖏᑦᑎᐊᕈᑎᒃᓴᕋᓗᐊᖏᓐᓄᑦ ᓄᓇᖅᑲᖅᑳᖅᓯᒪᔪᑦ.
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᐱᕕᖃᕐᑎᑦᑎᕗᖅ ᐃᒪᓐᓇ:
- ᓇᓗᓇᐃᕐᓗᒋᑦ ᐱᐅᓯᑦ ᐸᕿᓂᕐᒧᑦ
- ᐃᑲᔪᕐᓗᒋᑦ ᓴᓇᔭᖏᑦ ᑕᒪᐃᓐᓂᑦ ᒐᕙᒪᒃᑯᓂᑦ ᓴᕿᑦᑎᓗᑎᒃ ᑲᑎᖓᑦᑎᐊᖅᑐᒥᒃ, ᓄᓇᖅᑲᖅᑳᖅᓯᒪᔪᓂᒃ-ᐊᐅᓚᑕᐅᔪᑦ ᓵᑕᒃᓴᐅᔾᔪᑎᒃᓴᐃᑦ ᐱᐅᓯᕚᓪᓕᕐᓂᐊᕐᒪᑕ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐸᕿᓂᖅ, ᑖᒃᑯᐊᓗ ᖃᐅᔨᓴᖅᑎᑦ ᐱᕋᔭᒃᓯᒪᔪᖃᕐᒪᖔᑦ.
5. ᐃᒃᐱᒋᑦᑎᐊᕐᓗᒋᑦ ᐃᓚᒌᒍᓯᖏᑦ ᐊᕙᑖᓂᑦ ᓄᓇᖅᑲᖅᑳᖅᓯᒪᔪᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ
ᐃᓚᒌᒍᓯᖅ ᐊᕙᑖᓂᑦ ᓄᓇᖅᑲᖅᑳᖅᓯᒪᔪᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᐊᔾᔨᒌᒃᑎᑦᑎᖃᑦᑕᓐᖏᒻᒪᑕ, ᐊᓪᓚᐃᑦ ᐃᓄᐃᑦ ᐊᑐᓂ, ᒐᕙᒪᒃᑯᓂᑦ ᒐᕙᒪᒃᑯᓄᑦ ᐊᒻᒪᓗ ᐃᓄᐃᑦ-ᑲᓇᑕᐅᑉ ᒐᕙᒪᒃᑯᖏᑦᑎᒍᑦ.
ᐊᖏᕈᑎᑦ ᑲᓇᑕᒥ ᑲᓇᑕᐅᑉ ᒪᓕᒐᕐᔪᐊᖓᓂᑦ ᐃᓕᓴᕆᔭᐅᓯᒪᔪᑦ ᐊᖏᕈᑎᑦ ᐊᕙᑖᓂᑦ ᐊᓪᓚᐃᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ. ᑕᒫᖔᖅᑐᑦ ᐊᒻᒪᓗ ᐱᔾᔪᑎᖏᑦ ᐃᒃᐱᒋᔭᐅᑦᑎᐊᕐᓗᑎᒃ ᐊᒻᒪᓗ ᐊᑐᓕᖅᑎᑕᐅᓗᑎᒃ, ᐃᓚᒋᔭᐅᓗᑎᒃ ᐊᖏᕈᑎᑦ ᐱᔪᓐᓇᐅᑎᖃᕐᓂᖏᓐᓄᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ.
ᐃᓄᐃᑦ ᐊᒃᓱᕉᑎᖃᖅᓯᒪᕗᑦ ᐱᑕᖃᕆᐊᖃᕐᓂᖓᓂ ᐱᐅᓂᖅᓴᒥᒃ ᐃᓚᒌᒍᓯᖅ, ᐃᒃᐱᒍᓱᑦᑎᐊᕐᓗᑎᒃ ᐱᓕᕆᖃᑎᒋᔭᒥᖕᓂᒃ, ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᓈᓚᒡᓗᑎᒃ ᐃᓄᖕᓂᒃ.
ᐊᓪᓚᐃᖓᔪᑦ ᐅᖃᖅᓯᒪᔪᑦ ᐃᒡᓯᓐᓇᖅᑕᐅᖃᑦᑕᕋᒥᒎᖅ ᒫᓐᓇᐅᔪᖅ ᐊᑐᖅᑕᐅᔪᓂ ᒐᕙᒪᑐᖃᒃᑯᑦ ᓄᓇᖅᑲᖅᑳᖅᓯᒪᔪᓅᖓᑎᑕᖏᓐᓄᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐊᑐᐊᒐᕐᓂ ᐊᒻᒪᓗ ᐱᓕᕆᑎᑦᑎᔾᔪᑕᐅᔪᓂ. ᐃᓕᓴᕆᔭᐅᔪᒪᔪᑦ ᐊᒻᒪᓗ ᐃᓚᓕᐅᑎᔭᐅᓗᑎᒃ, ᐊᒻᒪᓗ ᑮᓇᐅᔭᒃᓴᓂᒃ ᐊᒻᒪᓗ ᐊᖏᒡᓕᒋᐊᕐᓗᑎᒃ ᐱᓕᕆᑎᑦᑎᔾᔪᑕᐅᔪᑦ ᐅᑯᐊ ᓴᕿᑕᐅᓚᐅᖅᑐᑦ.
ᑭᑭᑕᐅᖃᑦᑕᖅᓯᒪᔪᑦ ᐅᑯᐊᑦᑕᐅᖅ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᖏᒡᓕᒋᐊᖁᔨᔪᑦ ᓄᓇᖅᑲᖅᑳᖅᓯᒪᔪᓄᑦ ᐱᔨᑦᑎᕋᐅᑎᖏᓐᓂᒃ ᑲᓇᑕᒥ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐱᓕᕆᑎᑦᑎᔾᔪᑕᐅᔪᓂᒃ ᐃᓚᓕᐅᑎᔭᐅᓗᑎᒃ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᑭᖕᖒᒪᓇᖅᑐ ᑭᑭᑕᐅᖃᑦᑕᖅᑐᓄᑦ ᐊᒻᒪᓗ ᓄᓇᖅᑲᖅᑳᖅᓯᒪᔪᑦ ᓇᓗᓇᐃᒃᑯᑕᖃᓐᖏᑦᑐᑦ. ᐅᑯᐊ ᐃᖅᓯᓐᓇᖅᑕᖃᐅᑦᑕᕐᒪᑕ ᑭᖑᓂᑦᑎᓐᓂ.
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᑐᓐᖓᕕᐅᔪᓐᓇᖅᑐᖅ ᓄᑖᓄᑦ ᐊᖏᕈᑎᓄᑦ ᐊᒻᒪᓗ ᐃᓚᒌᒍᓯᖏᓐᓄᑦ ᑖᒃᑯᓄᖓ ᐊᓪᓚᐃᑦ, ᐃᓄᐃᑦ, ᐊᓪᓚᐃᖓᔪᑦ, ᐊᒻᒪᓗ ᑭᑭᑕᐅᖃᑦᑕᖅᓯᒪᔪᑦ ᑭᒃᑯᑐᐃᓐᓇᐃᑦ. It ᐱᕕᖃᕐᑎᑦᑎᕗᖅ ᐃᒪᓐᓇ:
- ᐃᓕᑦᑎᓗᑕ ᑭᖑᓂᑦᑎᓐᓂᑦ ᒪᓕᒐᓕᕆᔾᔪᑕᐅᓚᐅᖅᑐᓂᒃ
- ᑐᑭᖃᖅᑐᓂᒃ ᐊᒻᒪᓗ ᐃᒃᐱᒍᓱᑦᑎᐊᖅᑐᓂᒃ ᐱᓕᕆᖃᑎᒋᓗᒋᑦ ᑕᒪᕐᒥᒃ ᐱᕙᓪᓕᐊᑎᑦᑎᓂᐊᕐᒪᑕ, ᒪᓕᒡᓗᒋᑦ ᐃᓚᖓ 18 ᐊᒻᒪᓗ 19 ᑖᒃᑯᓇᓂ ᔪᓇᐃᑎᑦ ᓇᐃᓴᓐᔅ ᐊᖏᕈᑎᖏᑦ ᓱᓕᓂᕋᐅᑎᖏᑦ ᐱᔪᓐᓇᐅᑎᖃᕐᓂᖏᓐᓄᑦ ᓄᓇᖅᑲᖅᑳᖅᓯᒪᔪᑦ
- ᐊᑐᓕᖅᑎᑦᑎᑲᓐᓂᕐᓗᑎᒃ ᐊᒻᒪᓗ ᑎᑭᐅᑎᓗᒋᑦ ᐱᐅᓯᑦ ᐋᕿᒃᓯᒪᔪᑦ ᐅᑯᓇᓂ:
- ᔪᓇᐃᑎᑦ ᓇᐃᓴᓐᔅ ᐊᖏᕈᑎᖏᑦ ᓱᓕᓂᕋᐅᑎᖏᑦ ᐱᔪᓐᓇᐅᑎᖃᕐᓂᖏᓐᓄᑦ ᓄᓇᖅᑲᖅᑳᖅᓯᒪᔪᑦ
- ᑭᒡᓕᓯᓐᓂᐊᖅᑎᒃᑯᑦ ᐱᓕᕆᐊᖑᖁᔭᖏᑦ
- ᔪᐊᑕᓐ ᑐᓐᖓᔾᔪᑖ
- ᑲᓇᑕᒥ ᑐᑭᓯᓇᓱᖕᓂᖅ ᐊᓯᐅᖃᔪᓂᒃ ᐊᒻᒪᓗ ᐃᓄᐊᖅᑕᐅᓯᒪᔪᓂᒃ ᓄᓇᖅᑲᖅᑳᖅᓯᒪᔪᓂᒃ ᐊᕐᓇᓂᒃ ᐊᒻᒪᓗ ᓂᕕᐊᖅᓵᓂᒃ
- ᑲᓇᑕᐅᑉ ᒐᕙᒪᒃᑯᖏᑦ ᓄᓇᖅᑲᖅᑳᖅᓯᒪᔪᑦ ᐱᓪᓗᒋᑦ ᕿᒥᕐᕈᐊᖅᑎᖏᑦ
- ᔪᐃᔅ ᑕᓐᖓᔾᔪᑖ
6. ᐊᑑᑎᖃᖅᑐᓂᒃ, ᓈᒻᒪᒃᑐᓂᒃ, ᓄᖑᑲᐅᑎᒋᔮᓐᖏᑦᑐᓂᒃ, ᐃᓚᓕᐅᔾᔨᑦᑎᐊᖅᓯᒪᔪᓂᒃ ᐊᒻᒪᓗ ᐊᓯᕈᖅᑕᕐᕕᖃᕈᓐᓇᖅᑐᓂᒃ ᑮᓇᐅᔭᒃᓴᓂᒃ ᐊᑐᐃᓐᓇᖅᑕᖃᕐᓗᓂ ᓄᓇᖅᑲᖅᑳᖅᓯᒪᔪᓄᑦ
ᒫᓐᓇᐅᔪᖅ ᑮᓇᐅᔭᒃᓴᐃᑦ ᐋᕿᒃᓱᖅᓯᒪᔪᑦ ᐃᑲᔪᓐᖏᑦᑐᑦ ᓄᓇᖅᑲᖅᑳᖅᓯᒪᔪᓂᒃ ᓇᖕᒥᓂ-ᐊᐅᓚᑦᑎᔪᓐᓇᕐᓂᕐᒧᑦ ᐃᓗᐊᓂ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ. ᑕᑯᔭᐅᖃᑦᑕᕐᒪᑕ ᓄᓇᖅᑲᖅᑳᖅᓯᒪᔪᓂᖔᖅᓯᒪᕐᐸᑦ, ᐱᔭᕐᓂᓐᖏᑦᑐᖅ ᐊᒻᒪᓗ ᐸᒡᕕᓇᖅᑐᖅ. ᓄᓇᖅᑲᖅᑳᖅᓯᒪᔪᑦ ᑲᑎᒪᔨᖏᑦ ᑮᓇᐅᔭᒃᓴᖅᑖᖃᑦᑕᕈᒪᕗᑦ ᐋᕿᒃᓯᒪᔾᔪᑎᒃᓴᓄᑦ, ᐅᓄᓐᖏᓐᓂᖅᓴᐃᑦ ᐅᖃᖃᑦᑕᕐᓂᐊᕐᒪᑕ ᐸᒡᕕᓂᕋᕐᓗᑎᒃ, ᐊᒻᒪᓗ ᑮᓇᐅᔭᒃᓴᖃᕐᑎᑦᑎᔾᔪᓯᖏᑦ ᑕᒪᐃᓐᓄᓕᒫᖓᔪᑦ ᐊᒻᒪᓗ ᑭᖕᖒᒪᒋᔭᐅᓕᕌᖓᑕ ᑭᓯᐊᓂ.
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᐱᕕᖃᕐᑎᑦᑎᕗᖅ ᐃᒪᓐᓇ:
- ᓴᓇᑲᓐᓂᕐᓗᒋᑦ ᒫᓐᓇᐅᔪᖅ ᐊᑐᖅᑕᐅᔪᑦ ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᑮᓇᐅᔭᒃᓴᓕᕆᔾᔪᓯᖏᑦᑎᒍᑦ
- ᐋᕿᑦᑎᐊᕐᓗᒋᑦ ᑮᓇᐅᔭᐃᑦ ᓄᓇᖅᑲᖅᑳᖅᓯᒪᔪᑦ ᑲᑎᒪᔨᖏᓐᓄᑦ ᐊᒻᒪᓗ ᓇᓕᖃᕇᑦᑎᐊᕐᓗᑎᒃ, ᓈᒻᒪᒡᓗᑎᒃ ᐊᖏᓂᖏᑦ, ᓄᖑᑲᐅᑎᒋᔮᓐᖏᑦᑐᓂᒃ, ᐃᓚᓕᐅᔾᔨᑦᑎᐊᖅᓯᒪᔪᓂᒃ ᐊᒻᒪᓗ ᐊᓯᕈᖅᑕᕐᕕᖃᕈᓐᓇᖅᑐᓂᒃ
7. ᓄᓇᖅᑲᖅᑳᖅᓯᒪᔪᓂᑦ ᐊᐅᓚᑕᐅᓗᑎᒃ ᖃᐅᔨᓴᕈᑎᑖᑦ ᐊᒻᒪᓗ ᑐᓴᒐᒃᓴᐃᑦ ᐊᑐᐃᓐᓇᐅᔪᑦ ᐃᑲᔫᑎᓂᐊᖅᑐᑦ ᒪᒥᓴᕐᓂᕐᒧᑦ
ᑲᒪᒋᔭᐅᑦᑎᐊᓐᖏᒻᒪᑕ ᐊᕙᑖᓂᑦ ᑲᓇᑕ ᐊᕕᒃᑐᖅᓯᒪᔪᑦ, ᑎᐅᓕᑐᐊᓕᔅ ᐊᒻᒪᓗ ᒐᕙᒪᑐᖃᒃᑯᑦ ᐋᓐᓂᐊᖃᕐᓇᓐᖏᑦᑐᓕᕆᓂᖏᑦ ᐋᕿᒃᓯᓯᒪᓕᖃᑦᑕᖅᑐᑦ ᑐᓗᖅᑕᐅᑎᖃᖅᖢᑎᒃ ᐱᓇᓱᒋᐊᒃᓴᖅ ᐊᒻᒪᓗ ᐊᑐᕆᐊᒃᓴᖅ ᖃᐅᔨᓴᕈᑎᕕᓃᑦ. ᒫᓐᓇᐅᔪᖅ ᖃᐅᔨᓴᕈᑏᑦ ᐊᒻᒪᓗ ᐱᒋᐊᕈᑎᑦ ᖃᓪᓗᓈᑎᑑᖓᔪᑦ ᐊᒻᒪᓗ ᐱᐅᓯᖏᓐᓄᑦ ᓈᒻᒪᐃᓐᓇᖃᑦᑕᓐᖏᑦᑐᑦ. ᓄᓇᖅᑲᖅᑳᖅᓯᒪᔪᑦ ᓄᓇᖏᑦ ᐊᒻᒪᓗ ᐊᐅᓚᑦᓯᔨᖏᑦ ᓴᕿᑦᑎᓕᑦ ᐱᒻᒪᕆᐅᓂᖓᓂᒃ ᐱᔭᕆᐊᖃᖅᖢᓂ ᖃᐅᔨᓴᕈᑎᕕᓂᕐᓂᒃ ᐱᐅᓯᕚᓪᓕᕐᓂᐊᕐᒪᑕ ᐱᕙᓪᓕᐊᔪᓕᕆᓂᖅ ᐊᒻᒪᓗ ᑐᓂᓯᓯᒪᓂᖅ ᐋᓐᓂᐊᕕᖕᓂ ᐱᔨᑦᑎᕋᐅᑎᓂᒃ.
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᐱᕕᖃᕐᑎᑦᑎᕗᖅ ᐃᒪᓐᓇ:
- ᐃᒃᐱᒋᑦᑎᐊᕐᓗᒋᑦ ᓄᓇᖅᑲᖅᑳᖅᓯᒪᔪᑦ ᖃᐅᔨᓴᕈᑎᑖᑦ ᓄᓇᖁᑎᑐᖃᖏᓐᓂᒃ
- ᐱᐅᓯᕚᓪᓕᖅᑎᓪᓗᒋᑦ ᖃᐅᔨᓴᕈᑎᑖᑦ ᐊᐅᓚᑕᐅᓂᖏᑦ ᒪᓕᒃᓗᑎᒃ ᓇᖕᒥᓂᑐᖃᕆᖕᒪᒋᑦ, ᐊᐅᓚᑦᑐᓐᓇᖅᓯᓗᒋᑦ, ᐱᔪᓐᓇᖅᓯᓗᒋᑦ, ᐱᓯᒪᐃᓐᓇᕈᓐᓇᓕᕐᓗᒋᑦ,
- ᖃᑭᔾᔪᑎᒃᓴᓕᐅᕐᓂᖅ ᖃᐅᔨᓴᕈᑎᑖᓄᑦ ᐱᓕᕆᔨᒃᓴᓂᒃ
- ᐊᔪᕈᓐᓃᖅᑎᑦᑎᓗᑎᒃ ᑐᓂᔭᐅᔪᓐᓇᕐᒥᓗᒋᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᖃᐅᔨᓴᕈᑎᑦ ᐊᐅᓚᑕᐅᔪᑦ ᑲᓇᑕᒥ ᐊᕕᒃᑐᖅᓯᒪᔪᓂᑦ, ᑎᐅᓕᑐᐊᓕᔅ ᐅᕝᕙᓘᓐᓃᑦ ᒐᕙᒪᑐᖃᒃᑯᓂᑦ ᐅᑎᖅᑎᑕᐅᓗᑎᒃ ᓄᓇᖅᑲᖅᑳᖅᓯᒪᔪᑦ ᓄᓇᖏᓐᓄᑦ.
8. ᐊᑦᑕᕐᓇᖅᑐᒦᑦᑐᑦ ᐋᓐᓂᐊᕕᓕᐊᕆᐊᓕᖕᓄᑦ ᐱᔨᑦᑎᕋᐅᑎᖏᑦ ᑎᑭᐅᑎᓯᒪᑦᑎᐊᕐᓗᑎᒃ ᑭᖕᖒᒪᒋᔭᖏᓐᓄᑦ
ᑲᓇᑕᒥ ᐊᓪᓚᐃᑦ, ᐃᓄᐃᑦ, ᐊᓪᓚᐃᖓᔪᑦ, ᐊᒻᒪᓗ ᑕᒪᐃᓐᓄᑦ ᐱᓇᓱᐊᖃᑕᐅᔪᑦ ᐊᑐᖅᓯᑎᑕᐅᖃᑦᑕᕐᒪᑕ ᐊᖏᔪᒥᒃ ᑭᑭᑕᐅᓪᓗᑎᒃ ᐋᓐᓂᐊᕕᖕᒥ ᐱᔨᑦᑎᕋᐅᑎᓂᒃ ᑖᒃᑯᓇᖓᓪᓕ ᓄᓇᖅᑲᖅᑳᖅᓯᒪᔫᓐᖏᑦᑐᓂᑦ ᑲᓇᑕᒥᐅᓂᑦ. ᐃᖅᐸᖅᓯᒪᔪᑦ ᐱᑕᖃᖅᑐᑦ ᓇᒥᑐᐃᓐᓇᖅ ᓄᓇᖃᕋᓗᐊᕈᕕᑦ ᓄᓇᓕᖅᐸᐅᔭᓂ, ᐃᓄᑭᓐᓂᖅᓴᓂ ᐅᕝᕙᓘᓐᓃᑦ ᐅᖓᓯᒃᑐᒥᐅᑕᐅᒍᕕᑦ. ᐅᑯᐊ ᐃᖃᖅᐸᖅᓯᒪᓂᐅᕙᒃᑐᑦ ᑭᑭᑕᐅᕙᒃᑐᑦ ᐃᓚᒋᔭᐅᕗᑦ, ᑭᓯᐊᓂ ᐊᓯᖏᑦᑕᐅᖅ ᐊᒥᓱᑦ:
- ᐃᕐᓂᓱᒃᓰᓂᖅ
- ᐃᓱᒪᒥᒃ ᒪᒥᓴᐃᓂᖅ
- ᐊᔪᓕᖅᓯᒪᔪᓂᒃ ᐸᕿᓂᖅ
- ᐊᐃᑉᐸᕇᖕᓂᕐᒧᑦ ᐋᓐᓂᐊᖃᕐᓇᓐᖏᑦᑐᓕᕆᓂᖅ ᐱᔨᑦᑎᕋᐅᑎᑦ
- ᖃᕆᓴᐅᔭᒃᑯᑦ ᐸᕿᓂᖅ ᐊᒻᒪᓗ ᐃᑭᐊᕿᕕᒃᑯᑦ ᐊᑐᖅᓯᓂᖅ
- ᐃᑲᔪᖅᑎᐅᖃᑕᐅᔪᑦ
- ᐊᖑᑎᓄᑦ ᐊᕐᓇᓄᑦ-ᐱᓯᒪᔪᑦ ᐊᑐᓂ ᐸᕿᓂᖅ
- ᐋᓐᓂᐊᕕᓕᐊᕈᓐᓇᐅᑎᑦ ᐃᑲᔫᓯᐊᕈ ᓇᓪᓕᐅᒃᑯᒻᒫᑦ
- ᓇᑉᐸᕆᐊᓕᑦ ᐱᖁᑎᕐᔪᐊᑦ
- ᐃᓄᒃᑎᑑᓕᕆᓂᖅ
- ᐃᖏᕐᕋᔾᔪᑎᓕᕆᓂᖅ
- ᐊᐅᓪᓚᕆᐊᓕᖕᓄᑦ ᐊᒻᒪᓗ ᖃᐅᔨᒪᔨᒻᒪᕆᐅᓂᖅ ᐃᑲᔫᑎᖏᑦ
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᐱᕕᖃᕐᑎᑦᑎᕗᖅ ᐱᓕᕆᓗᑎᒃ ᐊᖏᔪᒥᒃ ᐊᒻᒪᓗ ᒫᓐᓇ ᑐᐊᕕᕐᓇᖅᓯᔪᖅ ᐅᖃᐅᓯᕆᓗᒋᑦ ᐱᓕᕆᐊᕆᓗᒋᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐱᔨᑦᑎᕋᐅᑎᓂᒃ ᑭᖕᖒᒪᓇᖅᑐᑦ
9. ᐃᑲᔪᕐᓗᑎᒃ ᐊᒻᒪᓗ ᐋᕿᒃᓱᐃᓗᑎᒃ ᐱᓕᕆᔪᓐᓇᖅᑐᓂᒃ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᐃᖅᑲᓇᐃᔭᖅᑎᒃᓴᓂᒃ
ᐋᓐᓂᐊᕕᖕᓂ ᐱᓇᓱᐊᖅᑎᑦ ᓴᕿᑦᑎᓗᑎᒃ ᓄᓇᓕᖕᓂ-ᐃᓄᒃᓯᐅᑎᓂᒃ ᐱᐅᓯᑐᖃᖏᓐᓂᒃ ᖃᐅᔨᒪᑦᑎᐊᖅᑐᓂᒃ ᑐᓂᓯᓯᒪᓂᐊᕐᒪᑕ ᐃᓅᖃᑎᒥᖕᓄᑦ-ᐱᓯᒪᔪᓂᒃ ᐸᕿᓂᖅ ᐊᒻᒪᓗ ᐋᕿᒃᓱᕐᓗᒋᑦ ᐃᓚᒌᒍᑎᖏᒃ ᐊᕙᑖᓂᑦ ᑐᓂᓯᓯᒪᕙᒃᑐᑦ, ᐃᑲᔪᖅᑕᐅᔪᑦ ᐊᒻᒪᓗ ᓄᓇᓖᑦ. ᐋᓐᓂᐊᕕᖕᓂ ᓴᓇᔩᑦ ᒪᓕᒐᕐᒥᒃ ᐊᑐᖅᓯᓗᑎᒃ ᐱᔭᕆᐅᖅᓴᓯᒪᓗᑎᒃ ᐅᑯᓇᓂ:
- ᓄᓇᖅᑲᖅᑳᖅᓯᒪᔪᑦ ᐱᐅᓯᖏᑦ ᖃᐅᔨᒪᔭᐅᑦᑎᐊᓕᕐᓗᑎᒃ
- ᐅᕕᓂᖃᑎᒋᓐᖏᑕᒥᒃ ᐊᑭᕋᖅᑐᖅᑕᐃᓕᓂᖅ
- ᓵᓚᖃᕋᓱᐊᓗᐊᓐᖏᓪᓗᑎᒃ ᐳᖅᑐᓂᖅᓴᐅᓇᓱᓐᖏᓪᓗᑎᒃ
- ᖁᐊᖅᓵᓇᖅᑐᑰᖅᓯᒪᔪᓂᒃ ᐸᕿᔪᓐᓇᕐᓗᑎᒃ
ᐊᒻᒪᓗᑦᑕᐅᖅ, ᓄᓇᖅᑲᖅᑳᖅᓯᒪᔪᑦ ᐱᓇᓱᐊᖃᑎᒋᔭᖏᑦ ᖃᐅᔨᑎᑦᑎᓗᑎᒃ ᐱᔭᕐᓂᓐᖏᑉᐸᒃᑐᓂᒃ ᐃᖅᑲᓇᐃᔭᖅᑎᑖᕋᓱᒡᖢᓂ ᐊᒻᒪᓗ ᐱᓯᒪᐃᓐᓇᕋᓱᒡᖢᓂ ᐋᓐᓂᐊᕕᖕᓂ ᖃᐅᔨᒪᔨᒻᒪᕆᖕᓂᒃ, ᐱᓗᐊᖅᑐᒥᒃ ᐅᖓᓯᒃᑐᒦᑦᑐᑦ ᓄᓇᓖᑦ ᐊᒻᒪᓗ ᐅᑭᐅᖅᑕᖅᑐᒥ.
ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ ᐱᕕᖃᕐᑎᑦᑎᕗᖅ ᐃᒪᓐᓇ:
- ᓴᓇᖃᑎᒋᓗᒋᑦ ᑕᒪᕐᒥᒃ ᒐᕙᒪᒃᑯᓕᒫᑦ ᐊᒻᒪᓗ ᓯᓚᑦᑐᖅᓴᕐᕕᑦ ᐊᖏᖅᓯᒪᑦᑎᐊᕐᓗᑎᒃ ᒪᓕᒐᕐᓂᒃ ᐊᑐᕆᐊᖃᖅᑐᑦ ᐱᔭᕆᐅᖅᓴᓯᒪᔭᕆᐊᖃᖅᑕᖏᓐᓄᑦ.
- ᐃᑲᔪᕐᓗᑎᒃ ᐃᖅᑲᓇᐃᔭᖅᑎᑖᕐᐸᓪᓕᐊᓂᕐᒧᑦ ᐊᒻᒪᓗ ᐱᓯᒪᐃᓐᓇᕈᑎᒃᓴᓄᑦ ᐋᕿᒃᓯᒪᔾᔪᑎᒃᓴᓂᒃ
- ᐅᓄᖅᓯᒋᐊᕐᓗᒋᑦ ᓄᓇᖅᑲᖅᑳᖅᓯᒪᔪᑦ ᑭᒡᒐᖅᑐᖅᑎᑦ ᐃᓗᐊᓂ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ
ᐃᓱᐊ ᐊᒻᒪᓗ ᑭᖑᓪᓕᕐᒥᒃ ᐱᓕᕆᐊᖑᓂᐊᖅᑐᑦ
ᑕᒪᐅᓐᓇ ᐊᓪᓚᐃᑦ, ᐃᓄᐃᑦ, ᐊᓪᓚᐃᖓᔪᑦ, ᐊᒻᒪᓗ ᑭᑭᑕᐅᖃᑦᑕᖅᓯᒪᔪᑦ ᑭᒃᑯᑐᐃᓐᓇᐃᑦ ᑕᐃᒫᒃ ᐊᔾᔨᒌᒍᖕᒪᑕ ᐃᓱᒪᓕᕈᑎᒃᓴᖏᑦ ᐱᔾᔪᑎᒋᓪᓗᒍ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᒪᓕᒐᒃᓴᖅ, ᐅᓇ ᒪᓕᒐᒃᓴᖅ ᐊᓯᕈᖅᑕᕐᕕᖃᕆᐊᖃᕐᓂᐊᖅᑐᖅ ᑕᐃᒫᒃ ᐃᒃᐱᒍᓱᑦᑎᐊᕐᓂᐊᕐᒪᑦ ᐊᔾᔨᐅᓐᖏᑦᑑᑕᐅᓂᖏᓐᓄᑦ ᑕᑯᔭᐅᔪᒪᔪᑦ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᑖᒃᑯᓇᖓᑦ ᓄᓇᖅᑲᖅᑳᖅᓯᒪᔪᑦ ᐊᔾᔨᒌᓐᖏᒻᒪᑕ ᓇᒥᑐᐃᓐᓇᖅ ᑲᓇᑕᒥ.
ᑕᒪᐃᓐᓄᑦ, ᑭᐅᔭᐅᒍᑎᒃ ᑕᐃᑲᓂ ᐱᓕᕆᖃᑎᒌᒃᑎᓪᓗᒋᑦ ᑲᑎᒪᑎᓪᓗᒋ ᐱᓯᒪᓂᖃᕐᓂᐊᖅᑐᑦ ᓂᕆᐅᖕᓂᕐᒥᒃ ᐊᒻᒪᓗ ᓴᕆᒪᒍᓱᖕᓂᕐᒥᒃ ᑖᓐᓇ ᒪᓕᒐᒃᓴᖅ ᐃᒪᓐᓇᐅᓂᐊᕐᒪᑦ:
- ᐃᑲᔪᕐᓗᓂ ᓄᓇᖅᑲᖅᑳᖅᓯᒪᔪᑦ-ᐊᐅᓚᑦᑎᓗᑎᒃ ᐱᒋᐊᕈᑎᑦ
- ᐱᒋᐊᖅᐸᓪᓕᐊᑎᑦᑎᓂᖅ ᐊᖏᖅᓯᒪᑦᑎᐊᕐᓗᑎᒃ ᓄᓇᖅᑲᖅᑳᖅᓯᒪᔪᑦ ᐱᖁᑎᑐᖃᕆᖕᒪᒋᑦ ᓄᓇᖓᓐᓂ
- ᐱᐅᓯᕚᓪᓕᖅᑎᓪᓗᒍ ᐋᓐᓂᐊᖃᕐᓇᓐᖏᑦᑐᓕᕆᓂᕐᒥ ᓇᓕᖃᕇᑦᑎᐊᖅᑎᑕᐅᓂᖅ
ᑭᖑᓪᓕᕐᒥᒃ ᐱᓕᕆᐊᖑᓂᐊᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᓴᕿᑦᑎᖃᑎᒌᒡᓗᑎᒃ ᒪᓕᒐᒃᓴᓂᒃ ᓄᓇᖅᑲᖅᑳᖅᓯᒪᔪᓪᓗ ᐱᓇᓱᐊᖃᑎᒋᔭᑎᒃ ᐊᒻᒪᓗ, ᑖᒃᑯᐊᓗ ᐊᑑᑎᖃᕐᓂᖏᑦ, ᑲᓇᑕᒥ ᐊᕕᒃᑐᖅᓯᒪᔪᑦ ᐊᒻᒪᓗ ᑎᐅᓕᑐᐊᓕᔅ. ᐅᓇ ᐱᓕᕆᐊᖑᓂᐊᖅᑐᖅ ᐊᔾᔨᒋᔭᐅᓐᖏᑦᑑᓂᖏᑦ ᒪᓕᒡᓗᒋᑦ. ᐅᓇ ᑐᕌᕆᔭᖓᑦ ᑭᖑᓪᓕᕐᒥᒃ ᐱᕙᓪᓕᐊᓂᕆᓂᐊᖅᑕᖓᑦ ᓴᕿᑦᑎᑲᑎᒌᒡᓗᑎᒃ ᑕᒪᐃᓐᓂᒃ ᖃᓄᐃᑐᓐᓇᖅ ᐊᑭᖃᕋᓗᐊᖅᐸᑦ ᑕᕝᕗᖓ ᒪᓕᒐᒃᓴᐅᒐᔭᖅᑐᑦ ᒥᓂᔅᑕᖓᓄᑦ ᓄᓇᖅᑲᖅᑳᖅᓯᒪᔪᓄᑦ ᐱᔨᑦᑎᕋᖅᑎᖏᑦ ᑐᓂᓯᓂᐊᕐᒪᑦ ᒐᕙᒪᒃᑯᑦ ᒪᓕᒐᓕᐅᖅᑎᖏᓐᓄᑦ ᐱᓇᓱᐊᖃᑎᒋᔭᒥᖕᓄᑦ ᐃᓱᒪᓕᐊᖑᓂᐊᕐᒪᑕ ᑎᑭᐅᑎᓚᐅᓐᖏᓂᖓᓂ ᐅᐱᕐᖔᖅ 2023.
ᑐᑭᖏᑦ ᑕᐃᒎᓯᑦ ᑕᕝᕙᓂ
ᖃᐅᔨᓇᓱᑦᑎᐊᖃᑎᒌᖕᓂᖅ: ᓴᓇᖃᑎᒌᒡᓗᑎᒃ ᑕᒪᐅᓐᓇ ᑐᑭᓯᓇᓱᖃᑎᒌᑦᑎᐊᖃᑦᑕᕐᓗᑎᒃ ᐋᕿᒃᓂᐊᕐᒪᑕ ᑐᑭᓯᓇᖅᓯᑦᑎᐊᕐᓗᑎᒃ ᓄᓇᖅᑲᖅᑳᖅᓯᒪᔪᑦ ᐱᓇᓱᐊᖃᑕᐅᔪᑦ ᐅᖃᐅᓯᖏᑦ ᐊᒻᒪᓗ ᑖᓐᓇ ᑐᑭᓯᓇᖅᓯᑎᑦᑎᓯᒪᔪᖅ ᓇᐃᓈᖅᓯᒪᔪᖅ ᐃᒃᐱᒋᔭᐅᑦᑎᐊᕐᓗᓂ ᐊᒻᒪᓗ ᐱᓯᒪᓂᖃᑦᑎᐊᕐᓗᓂ ᐱᓇᓱᖃᑎᒋᔭᒥᒃ ᑕᐅᑦᑐᖏᓐᓂᒃ, ᐅᖃᐅᓯᖏᓐᓂᒃ, ᐊᑐᖅᓯᒪᔭᖏᓐᓂᒃ ᐊᒻᒪᓗ ᐱᓇᐊᖃᑕᐅᓂᖏᓐᓂᒃ.
ᐱᕙᓪᓕᐊᑎᑦᑎᖃᑎᒌᖕᓂᖅ: ᐃᓗᐊᓂ ᐅᓂᒃᑳᖅ, "ᐱᕙᓪᓕᐊᑎᑦᑎᖃᑎᒌᖕᓂᖅ" ᐱᔾᔪᑎᓕᒃ ᓄᓇᖅᑲᖅᑳᖅᓯᒪᔪᑦ ᐱᓇᓱᐊᖃᑕᐅᔪᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᓴᓇᖃᑎᒌᑦ ᑕᒪᐅᓐᓇ ᑐᑭᓯᓇᓱᖃᑎᒌᖃᑦᑕᖅᖢᑎᒃ ᐊᖏᖃᑎᒌᑦᑎᐊᕐᓂᐊᕋᒥᒃ ᒪᓕᒐᒃᓴᕐᒧᑦ ᑐᒃᓯᕋᖅᑕᐅᔪᖅ ᓄᓇᖅᑲᖅᑳᖅᓯᒪᔪᓄᑦ ᐊᑕᔪᓄᑦ ᑕᕝᕗᖓ ᓄᓇᖅᑲᖅᑳᖅᓯᒪᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ .
ᓄᓇᖅᑲᖅᑳᖅᓯᒪᔪᓄᑦ ᐊᑕᔪᑦ+: ᓂᓪᓕᐅᑎᒋᔭᐅᔪᖅ ᑖᓐᓇ ᐊᑐᓂ ᓄᓇᓕᖕᓂ ᐊᔾᔨᒌᓐᖏᑦᑑᓂᖏᓐᓄᑦ ᐱᐅᓯᑐᖃᖏᑦ, ᑎᐊᓕᑐᐊᓕᔅ ᐃᒻᒪᑲᓪᓚᒃ ᐊᑕᖅᓯᒪᖏᑦᑎᒍᑦ, ᐊᒻᒪᓗ ᐃᓚᒌᒍᓯᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᐊᒻᒪᓗ ᐊᔾᔨᐅᓐᖏᑦᑐᒥᒃ ᓴᖕᖏᓂᖃᐅᕐᒪᑕ ᐋᕿᒃᓱᕐᓂᐊᕐᓗᒋᑦ ᑕᕝᕗᖓ ᐊᒻᒪᓗ ᐱᔭᕐᓂᓐᖏᑦᑐᑦ ᓵᖃᑦᑕᖅᑕᖏᑦ. ᓄᓇᖅᑲᖅᑳᖅᓯᒪᔪᓄᑦ ᐊᑕᔪᑦ+ ᐱᒋᐊᕈᑎᒋᓪᓗᒍ ᑐᑭᖃᖅᑐᖅ ᓴᓇᖃᑎᒋᓗᒋᑦ ᐊᑐᓂ ᐊᓪᓚᐃᑦ, ᐃᓄᐃᑦ, ᐊᓪᓚᐃᖓᔪᑦ ᐊᒻᒪᓗ ᑭᑭᑕᐅᖃᑦᑕᖅᓯᒪᔪᑦ ᑭᒃᑯᑐᐃᓐᓇᐃᑦ ᐃᓕᓴᕆᓯᒪᓗᒋᑦ ᐊᔾᔨᒌᓐᖏᑑᖕᒪᑕ ᖃᓄᐃᓕᖓᓂᕆᔭᖏᑦ.
ᐃᓄᒻᒪᕆᐅᒍᓯᕐᒧᑦ ᐊᑕᔾᔪᓯᖅ: ᖃᓄᖅ ᐊᔾᔨᒋᔭᐅᓐᖏᓂᖏᑦ ᐃᓅᑉ ᑭᓇᐅᓂᖓᑦ ᑕᒪᐃᑕ. ᐅᓇ ᐃᓗᓕᖓ ᐅᓂᒃᑳᒥ, "ᐃᓄᒻᒪᕆᐅᒍᓯᕐᒧᑦ ᐊᑕᔾᔪᓯᖅ" ᐱᓯᒪᔪᖅ ᖃᓄᖅ ᐃᓄᒃ ᓄᓇᖅᑲᖅᑳᖅᓯᒪᔫᓂᖓ, ᐊᖑᑎᑦ ᐊᕐᓇᐃᑦ, ᑕᐅᑦᑐᖓ, ᐃᓅᓯᓕᕆᓂᕐᒥ-ᑮᓇᐅᔭᓕᐅᕐᓂᕐᒥ ᖃᓄᐃᓕᖓᓂᖓᑦ ᐅᕝᕙᓘᓐᓃᑦ ᐊᓯᖏᑦ ᐃᒻᒥᓄᑦ ᐊᑕᔪᑦ ᑭᓇᐅᓂᕐᒥᓄᑦ ᖃᓂᕇᓕᕈᑎᓯᒪᕙᒃᑐᑦ ᐊᒃᑐᐃᓪᓗᑎᒃ ᐅᕕᓂᖃᑎᒋᔭᐅᓐᖏᓇᒥᒃ ᐊᑭᕋᖅᑐᖅᑕᐅᓲᑦ. ᐅᓇ ᐃᓕᓚᐅᔾᔨᓯᒪᓂᖅ ᓇᓗᓇᐃᒃᑯᑎᖃᓐᖏᑦᑐᓂᒃ ᐊᒻᒪᓗ ᐊᑕᓐᖏᑦᑐᓂᒃ ᐊᓪᓚᓄᑦ, ᐊᓪᓚᐃᖓᔪᓄᑦ ᐊᒻᒪᓗ ᐃᓄᖕᓄᑦ ᐊᑐᓂ.
ᒪᓕᒐᖑᕈᓐᓇᖅᑐᑦ: ᖃᓄᐃᑐᓐᓇᖅ ᐊᑭᖃᕋᓗᐊᖅᐸᑦ ᐊᑭᓕᖅᓯᒪᔪᖅ ᓄᓇᖅᑲᖅᑳᖅᓯᒪᔪᑦ ᐊᑕᔪᑦ ᐋᓐᓂᐊᖃᓇᓐᖏᑦᑐᓕᕆᓂᕐᒧᑦ ᒪᓕᒐᒃᓴᖅ . ᐊᑐᓕᖁᔭᐅᓂᐊᖅᑐᑦ ᒥᓂᔅᑕᒧᑦ ᓄᓇᖅᑲᖅᑳᖅᓯᒪᔪᓄᑦ ᐱᔨᑦᑎᕋᐅᑎᑦ ᑲᓇᑕ, ᐅᓇᓗ ᑐᓂᓯᓂᐊᖅᑐᖅ ᑲᓇᑕᐅᑉ ᒪᓕᒐᓕᐅᕐᔪᐊᖏᓐᓄᑦ ᐃᓱᒪᒃᓴᖅᓯᐅᕈᑕᐅᓂᐊᕐᒪᑦ.
ᓇᖕᒥᓂᖅ-ᐊᐅᓚᑦᑎᓂᖅ: ᐃᓚᖓ 3 ᑕᒡᕙᓂ ᔪᓇᐃᑎᑦ ᓇᐃᓴᓐᔅ ᐊᖏᕈᑎ ᓱᓕᓂᕋᐅᑎ ᐱᔪᓐᓇᐅᑎᖃᕐᓂᖏᓐᓄᑦ ᓄᓇᖅᑲᖅᑳᖅᓯᒪᔪᑦ ᐅᖃᖅᓯᒪᔪᖅ: "ᓄᓇᖅᑲᖅᑳᖅᓯᒪᔪᑦ ᐱᔪᓐᓇᐅᑎᖃᖅᑐᑦ ᓇᖕᒥᓂ-ᐊᐅᓚᑦᑎᔪᓐᓇᕐᓗᑎᒃ. ᑕᒪᐅᓐᓇ ᐱᔪᓐᓇᐅᑎᖃᖅᑐᑦ ᐃᓱᒪᖅᓱᕐᓗᑎᒃ ᐃᓱᒪᓕᐊᕆᔪᓐᓇᕐᓗᑎᒃ ᓂᕈᐊᖅᑕᐅᓯᒪᓂᕐᒥᑎᒍᑦ ᐊᒻᒪᓗ ᐃᓱᒪᖅᓱᕐᓗᑎᒃ ᐱᓕᕆᔪᓐᓇᖅᑐᑦ ᑮᓇᐅᔭᓕᐅᕈᑎᒃᓴᒥᖕᓄᑦ, ᐃᓅᓯᓕᕆᓂᕐᒧᑦ ᐊᒻᒪᓗ ᐱᐅᓯᑐᖃᒥᒃᑎᒍᑦ ᐱᕙᓪᓕᐊᑎᑦᑎᓂᕐᒧᑦ." ᑲᓇᑕᒥ, ᐅᓇ ᐱᔾᔪᑎᖃᕐᒥᔪᖅ ᑲᓇᑕᐅᑉ ᒐᕙᒪᒃᑯᖏᑦ ᐃᓕᓴᖅᓯᓗᑎᒃ ᓄᓇᖅᑲᖅᑳᖅᓯᒪᔪᑦ ᐱᔪᓐᓇᐅᑎᖃᕐᒪᑕ ᓇᖕᒥᓂᖅ-ᐊᐅᓚᑦᑎᔪᓐᓇᖅᖢᑎᒃ, ᑖᒃᑯᐊᓗ ᐃᒻᒥᒍᑦ ᐱᔪᓐᓇᐅᑎᑐᖃᖃᕐᒪᑕ ᓇᖕᒥᓂ-ᒐᕙᒪᖃᕐᓗᑎᒃ.
ᓄᓇᐃᖅᓯᓯᒪᔪᑦ- ᖃᓪᓗᓈᖑᖅᑎᑕᐅᓂᖅ: ᓄᖃᔮᓐᖏᑦᑐᒥᒃ ᓴᖕᖏᔾᔪᓯᖅ ᐅᑯᐊ ᓄᓇᖅᑲᖅᑳᖅᓯᒪᔪᑦ ᐊᑕᔪᑦ ᓄᓇᐃᖅᓯᓯᒪᔪᓄᑦ ᖃᓪᓗᓈᓂᒃ ᐃᓃᖅᑕᐅᓯᒪᖕᒪᑕ ᑎᑭᑦᑐᓂᒃ ᓄᓇᑖᖅᑐᓂᑦ ᓄᓇᓪᓛᕆᓕᖅᖢᒋᑦ ᑖᒃᑯᐊ ᓄᓇᐃᑦ ᐊᒻᒪᓗ ᓄᓇᒥᐅᑕᖏᑦ.
- ᐅᓪᓗᖓᓂ ᐋᖅᑭᒋᐊᖅᑕᐅᔪᖅ: